Financial and Legal Consulting of The CIS Regional Cluster
             Az | Ru | En |
          
 
 
   

Rəsmi xronika


Azərbaycan Respublikasının Prezidenti İlham Əliyev oktyabrın 2-də Prezident sarayında Qara Dəniz və Xəzər Dənizi Sahibkarlar Konfederasiyaları Birliyinin və Türk Sənayeçiləri və İş Adamları Birliyinin prezidenti Arzuxan Doğanı, Mərmərə qrupu vəqfinin sədri Akkan Suveri və ATA Holdinqin baş direktoru Əhməd Erentoku qəbul etmişdir.
Azərbaycan Prezidenti ölkəmizdə Qara dəniz və Xəzər dənizi regionunda regional birbaşa xarici investisiyalar mövzusunda beynəlxalq konfransın keçirilməsinin böyük əhəmiyyətə malik olduğunu qeyd etdi və konfrans iştirakçılarına təbrik məktubu ünvanladığını bildirdi.
***

Oktyabrın 3-də Bakının Xətai rayonunun Yeni Əhmədli yaşayış sahəsində, Ukrayna meydanı yaxınlığında yenidən qurulmuş Heydər parkının, habelə ümummilli lider Heydər Əliyevin abidəsinin təntənəli açılışı olmuşdur.
Mərasimdə Azərbaycan Prezidenti İlham Əliyev iştirak etmişdir. Dövlətimizin başçısı ulu öndərin abidəsinin üzərindən ağ örtüyü götürdü, heykəlin önünə gül dəstəsi qoydu, parkla yaxından tanış oldu. Prezident İlham Əliyev burada belə bir istirahət guşəsinin yaradılmasından məmnun qaldığını bildirdi.
***

Azərbaycan Respublikasının Prezidenti İlham Əliyev oktyabrın 3-də Prezident sarayında Litvanın milli müdafiə naziri Yuozas Olekasın başçılıq etdiyi nümayəndə heyətini qəbul etmişdir.
Dövlətimizin başçısı Azərbaycanla Litva arasında ikitərəfli münasibətlərin bütün sahələrdə uğurla inkişaf etdiyini bildirdi. Prezident İlham Əliyev Litvanın milli müdafiə nazirinin ölkəmizə bu səfərinin də ikitərəfli münasibətlərimizin daha da inkişaf etdirilməsi işinə töhfə verəcəyinə əminliyini ifadə etdi.
***

Azərbaycan Respublikasının Prezidenti İlham Əliyev oktyabrın 3-də Prezident sarayında Moskva merinin birinci müavini, Azərbaycan ilə Moskva hökuməti arasında hökumətlərarası iqtisadi komissiyanın həmsədri Lyudmila Şvetsovanın rəhbərlik etdiyi nümayəndə heyətini qəbul etmişdir.
Dövlətimizin başçısı Azərbaycanda Moskvanın mədəniyyət günlərinin və Azərbaycan-Moskva hökumətlərarası iqtisadi komissiyanın iclasının keçirilməsinin əhəmiyyətinə toxundu və bu tədbirlərin Azərbaycan ilə Rusiya arasında əlaqələrin daha da möhkəmlənməsinə xidmət göstərdiyini bildirdi.
***

Oktyabrın 4-də Qafqaz Müsəlmanları İdarəsinin sədri şeyxülislam Allahşükür Paşazadə müqəddəs Ramazan ayı münasibətilə öz iqamətgahında iftar süfrəsi açmışdır.
Azərbaycan Prezidenti İlham Əliyev iftar mərasimində iştirak etmişdir. Dövlətimizin başçısı bildirmişdir ki, Azərbaycanda din dövlətdən ayrıdır. Bu, bizim Konstitusiyamıza görə belədir. Amma, eyni zamanda, din dövlətlə birdir. Çünki bizim amalımız birdir. O da ondan ibarətdir ki, ölkəmizin müstəqilliyi daha da möhkəmlənsin. Azərbaycanda bütün sosial problemlər öz həllini tapsın, işsizlik aradan qaldırılsın, yoxsulluq aradan qaldırılsın, ölkəmizin beynəlxalq mövqeləri möhkəmlənsin, regional müstəvidə aparıcı rol oynayaq. Bu fikirlər, bu ideyalar bütün Azərbaycan xalqını birləşdirən ideyalardır.
***

Azərbaycan Respublikasının Prezidenti İlham Əliyev oktyabrın 4-də Prezident sarayında Avropa Jurnalistika Mərkəzinin təşkil etdiyi Avropa Qonşuluq siyasəti seminarında iştirak edən Avropa İttifaqı ölkələrinin jurnalistlərini qəbul etmişdir.
Görüş zamanı dövlətimizin başçısı Azərbaycan-Avropa İttifaqı əməkdaşlığı, ölkəmizin təşəbbüsü və iştirakı ilə həyata keçirilən qlobal enerji layihələri, Ermənistan-Azərbaycan, Dağlıq Qarabağ münaqişəsi, Azərbaycanın beynəlxalq aləmdə mövqeyi, regional əməkdaşlıq və digər məsələlərlə bağlı suallara ətraflı cavab vermişdir.
     2006 — 2007, Financial and Legal Consulting of The CIS Supported by «Marco Computer Technologies» Dizayn MEQA şirkəti tərəfindən hazırlanıb