Ad:
E-mail:
Məlumat:

Azərbaycan Respublikası ərazisinə gətirilən tekstil mallarına nə qədər gömrük idxal rüsumu tətbiq olunur?	- Azərbaycan Respublikası Nazirlər Kabinetinin 2001-ci il 12 aprel tarixli 80 saylı Qərarına dəyişiklik edilməsi barədə 2003-cü il 22 dekabr tarixli 161 nömrəli Qərarı ilə təsdiq edilmiş "Azərbaycan Respublikası ərazisinə gətirilən mallar üzrə gömrük idxal rüsumlarının dərəcələri"nə əsasən Azərbaycan Respublikası ərazisinə gətirilən tekstil mallarına dəyərinin 15%-i həcmində gömrük idxal rüsumu, 31 yanvar 2005-ci il tarixli 11 saylı Qərarı ilə təsdiq edilmiş "Azərbaycan Respublikası ərazisinə gətirilən, əlavə dəyər vergisindən azad olunan malların siyahısı"na və Azərbaycan Respublikası Vergi Məcəlləsinə müvafiq olaraq vergiyə cəlb olunan idxalın 18% həcmində əlavə dəyər vergisi tətbiq olunur.
Hüquqi şəxs rəsmiləşdirdiyi mala görə vergi və rüsumunun pulunu möhlətlə ödəyə bilərmi?	- Azərbaycan Respublikası Gömrük Məcəlləsinin 119-cu və 120-ci maddəsinə əsasən Dövlət Gömrük Komitəsində müvafiq qaydada reyestrə salınmış bankların və digər kredit təşkilatlarının zəmanəti, malların və nəqliyyat vasitələrinin girovu əsasında gömrük ödənişlərinin ödənilməsi üçün müstəsna hallarda ödəyiciyə möhlət verilə bilər və bu möhlət müddəti yük gömrük bəyannaməsinin qəbul edildiyi gündən etibarən iki aydan artıq olmamalıdır.
Xarici şirkət tərəfindən (Azərbaycanda qeydiyyatda olan) ölkəmizə müvəqqəti idxal rejimi altında gətirilən mal və ya nəqliyyat vasitələri hansı müddətə qədər respublikamızda qala bilər və buna görə nə qədər gömrük rüsumu ödənilməlidir?	Hüquqi şəxslər tərəfindən müvəqqəti idxal rejimi altında gətirilən mal və ya nəqliyyat vasitələrinin gömrük rəsmiləşdirilməsi Azərbaycan Respublikası Nazirlər Kabinetinin 27 iyul 1998-ci il tarixli 160 nömrəli qərarı ilə təsdiq edilmiş "Azərbaycan Respublikasında müvəqqəti idxal (ixrac) edilən malların gömrük rüsumları və vergilərin ödənilməsindən tamamilə və ya qismən azad edilməsi Qaydaları"nda nəzərdə tutulmuş qaydada həyata keçirilir. Müvəqqəti gətirilən mal və ya nəqliyyat vasitələri üçün müəyyən edilmiş müvəqqəti idxal müddəti yenidən uzadılırsa, onda bəyan edilən günə sərbəst dövriyyə üçün buraxılış rejimində ödənilməli olan gömrük rüsumlarının və vergilərinin məbləğlərinin hər ay 3 faizi ödənilir.
Şirkətimiz respublikamızdan xaricə on min dollardan yuxarı pul aparmaq istəyir. Republikamızın normativ hüquqi aktları isə bu məbləğdən yuxarı pul çıxarılmasına imkan vermir. Bunun digər yolları (məsələn, bank vasitəsilə və s.) varmı?	Bütün rezidentlər tərəfindən xarici ölkələrdən mal alınması və xidmət göstərilməsi ilə bağlı pul hesablaşmaları Azərbaycan Respublikasının mövcud qanunvericiliyinə uyğun olaraq bank vasitəsi ilə aparılır. Hesablaşmalara nəzarət müvəkkil banklar tərəfindən həyata keçirilir..
Malın mənşəyini təsdiq edən sertifikatda hansı məlumatlar öz əksini tapmalıdır?	Konkret mal üzrə verilmiş sertifikatda aşağıdakı məlumatlar öz əksini tapmalıdır. ixracatçının adı və ünvanı; idxalatçının adı və ünvanı; nəql edilmə vasitələri və hərəkətin marşrutu (məlum olduğu qədər); yerlərin sayı, qablaşdırmanın növü, malların eyniləşdirilməsi (identifikasiyası) üçün lazım olan bütün məlumatların təsviri; brutto və netto çəkisi (bu göstəricilər daşınma (nəql edilmə) zamanı malın çəkisi əhəmiyyətli dərəcədə dəyişdirildikdə və ya bu mala standart olaraq tətbiq edilən vahidlərin sayı və ya həcmi ilə əvəz edilə bilər). Sertifikatın təsdiq edilmə yeri və tarixi, milli qanunvericiliyə uyğun olaraq malların mənşəyini təsdiq etmək səlahiyyəti olan orqanın adı və möhürü, həmin orqanın sertifikatın həqiqiliyini təsdiq etmək səlahiyyəti olan vəzifəli şəxsinin imzası əks etdirilir.
Təkrar idxal rejimi altında yerləşdirilən mallardan rüsum tutulurmu?	Təkrar idxal rejimi altında yerləşdirilən mallar Azərbaycan Respublikasının Gömrük Məcəlləsinin 5-ci fəslinin müddəalarına müvafiq olaraq həyata keçirilir. Belə ki, Azərbaycan Respublikasının gömrük ərazisindən ixrac gömrük rejiminə uyğun aparılmış Azərbaycan malları aparıldığı andan on il müddətinə qaytarıldığı halda, gömrük idxal rüsumları və digər ödənişlər alınmır. Lakin təkrar idxal gömrük rejimi altında yerləşdirilən mallar, təbii aşınma nəticəsində dəyişikliklər, normal şəraitdə daşınma və saxlanc itkiləri, həmçinin Azərbaycan Respublikası qanunvericiliyi ilə müəyyən edilmiş digər hallar istisna edilməklə aparıldığı vəziyyətdə olmalıdır. Yəni aparılan mallar ilkin vəziyyəti dəyişdirilmədən geri gətirilməlidir.
Respublikamıza gətirilən plastmas məişət əşyalarından nə qədər gömrük vergi və rüsumu alınır?	Azərbaycan Respublikasına idxal edilən plastmas məişət əşyaları, Azərbaycan Respublikası Nazirlər Kabinetinin "Azərbaycan Respublikasında ixrac-idxal əməliyyatları üzrə gömrük rüsumlarının dərəcələri, gömrük rəsmiləşdirilməsinə görə alınan yığımların miqdarı haqqında" 12.04.2001-ci il tarixli 80 saylı Qərarına dəyişiklik edilməsi barədə 2003-cü il 22 dekabr tarixli 161 nömrəli Qərarı ilə təsdiq edilmiş "Azərbaycan Respublikasının ərazisinə gətirilən mallar üzrə gömrük idxal rüsumlarının dərəcələri"nə müvafiq olaraq 15 faiz dərəcəsi ilə gömrük idxal rüsumuna, "Azərbaycan Respublikasının ərazisinə gətirilən, əlavə dəyər vergisindən azad olunan malların siyahısı" haqqında 31 yanvar 2005-ci il tarixli 11 saylı qərarına və Azərbaycan Respublikasının Vergi Məcəlləsinə uyğun olaraq vergi tutulan idxalın 18 faizi həcmində isə əlavə dəyər vergisinə cəlb edilir
Xarici İqtisadi Fəaliyyətin Mal Nomenklaturasına uyğun olaraq rüsumların tətbiqi zamanı malların kodlarının müəyyən edilməsi hansı qaydada həyata keçirilir?	Azərbaycan Respublikasında xarici iqtisadi fəaliyyətin tarif və qeyri-tarif tədbirlərinin həyata keçirilməsi üçün mühüm məsələ olan malların təsviri və kodlaşdırılması Ümumdünya Gömrük Təşkilatının Harmonikləşdirilmiş Sistemi bazasında qəbul olunmuş Müstəqil Dövlətlər Birliyi xarici iqtisadi fəaliyyətinin 9 rəqəmli Əmtəə nomenklaturasına uyğun olaraq müəyyən edilir. Belə ki, yeni "Azərbaycan Respublikasının Gömrük Tarifi" beynəlxalq təcrübədə qəbul olunmuş təsnifat sisteminə uyğun olaraq Dövlət Gömrük Komitəsi tərəfindən hazırlanaraq Azərbaycan Respublikasının Nazirlər Kabineti tərəfindən təsdiq olunmuşdur.
Hansı dövlətlərdən gətirilən mallar üçün idxal rüsumları alınmır və hansı mallar idxal rüsumlarından azaddır?	Rusiya Federasiyası, Ukrayna, Gürcüstan, Qazaxstan və Belorusiya Respublikası Hökumətləri ilə Azərbaycan Respublikası Hökuməti arasında bağlanmış azad ticarət sazişlərinə uyğun olaraq həmin ölkələrdən gətirilən mallardan idxal rüsumu alınmır. "Gömrük Tarifi haqqında" Azərbaycan Respublikası Qanununun 34-cü maddəsində və Azərbaycan Respublikası Nazirlər Kabinetinin "Azərbaycan Respublikasında ixrac-idxal əməliyyatları üzrə gömrük rüsumlarının dərəcələri haqqında" 22 aprel 1998-ci il tarixli 91 saylı qərarının 4-cü bəndində göstərilən mallar idxal rüsumuna cəlb olunmur.
Respublikamıza idxal olunan təbii mineral sulara görə nə qədər gömrük vergi və rüsumu nəzərdə tutulur?	Respublikamıza idxal olunan təbii mineral sulara Azərbaycan Respublikasının Vergi Məcəlləsinə əsasən 18 faiz həcmində əlavə dəyər vergisi və Azərbaycan Respublikası Nazirlər Kabinetinin "Azərbaycan Respublikasında ixrac-idxal əməliyyatları üzrə gömrük rüsumlarının dərəcələri, gömrük rəsmiləşdirilməsinə görə alınan yığımların miqdarı haqqında" 12 aprel 2001-ci il tarixli 80 saylı qərarına və 161 №-li 2003-cü il 22 dekabr tarixli qərarına görə 1 litr üçün 0,20 ABŞ dolları həcmində gömrük idxal rüsumu tutulur və 31 yanvar 2005-ci il tarixli 11 saylı qərarına görə 18% ƏDV tətbiq olunur.
Ölkəmizə idxal olunan qəzet və kitab üçün nə qədər gömrük vergi və rüsumu nəzərdə tutulur?	Respublikaya idxal olan qəzet və kitablar Azərbaycan Respublikası Nazirlər Kabinetinin "Azərbaycan Respublikasında ixrac-idxal əməliyyatları üzrə gömrük rüsumlarının dərəcələri, gömrük rəsmiləşdirilməsinə görə alınan yığımların miqdarı haqqında" 12 aprel 2001-ci il tarixli 80 saylı qərarına və 2003-cü il 22 dekabr tarixli 161 №-li qərarına əsasən 3 faiz həcmində idxal rüsumuna cəlb olunur və eyni zamanda "Azərbaycan Respublikası ərazisinə gətirilən, əlavə dəyər vergisindən azad olunan malların siyahısı haqqında" 31 yanvar 2005-ci il tarixli 11 saylı qərarı ilə ƏDV tətbiq olunmur.
Bədii, tarixi və ya arxeoloji sərvət olan əşyaların Azərbaycandan çıxarılması  qaydası necədir?	Azərbaycan Respublikasının Mədəniyyət Nazirliyi tərəfindən mühafizə siyahısına daxil edilmiş mədəniyyət sərvətləri xüsusi rejim əsasında verilmiş mühafizə dərəcəsinə müvafiq surətdə Azərbaycan Respublikası Mədəniyyət Nazirliyinin ixracının mümkünlüyü barədə verdiyi şəhadətnamə və 100 faiz məbləğində gömrük rüsumu ödənildikdən sonra, mühafizə dərəcəsi verilməmiş mədəniyyət sərvətləri isə sərbəst surətdə Azərbaycan Respublikasının gömrük ərazisindən aparıla bilər.
Gömrük rəsmiləşdirilməsinin sadələşdirilmiş qaydası hansı hallarda həyata  keçirilir?	Fiziki şəxslər tərəfindən Azərbaycan Respublikasının gömrük sərhədindən keçirilən istehsal və kommersiya məqsədləri üçün nəzərdə tutulmayan, ümumi dəyəri 1000 ABŞ dollarına ekvivalent və ya çəkisi 50 kq-dan artıq olmayan və mal vahidinin və ya dəstinin dəyəri (avtonəqliyyat vasitələri və aksizli mallar istisna olmaqla) 1000 ABŞ dollarını ötdükdə, həmin malların gömrük rəsmiləşdirilməsi gömrük ödənişləri alınmaqla sadələşdirilmiş qaydada aparılır.
Gömrük nəzarətini gömrük orqanının yerləşdiyi yerdən kənarda aparmaq mümkündürmü?	Azərbaycan Respublikasında mallara gömrük nəzarəti və gömrük rəsmiləşdirilməsi gömrük orqanının razılığı ilə gömrük orqanının yerləşdiyi yerdən kənarda keçirilə bilər