Financial and Legal Consulting of The CIS Regional Cluster
             Az | Ru | En |
          
 
 
   

Azərbaycan və Xorvatiya arasında ikitərəfli münasibətlərin böyük perspektivləri var
Xorvatiya Prezidenti Stepan Mesiçin Azərbaycana rəsmi səfəri


Oktyabrın 2-3 tarixlərində Xorvatiya Respublikasının Prezidenti Stepan Mesiç Azərbaycanda rəsmi səfərdə olmuşdur.
Xorvatiya Respublikasının Prezidenti Stepan Mesiç oktyabrın 2-də Fəxri xiyabana gəlmişdir.
Xorvatiya dövlətinin başçısı türk dünyasının görkəmli oğlu, ümummilli lider Heydər Əliyevin xatirəsini ehtiramla anaraq, məzarı önünə əklil qoydu.
Xorvatiya Prezidenti görkəmli oftalmoloq alim, akademik Zərifə xanım Əliyevanın məzarı üstünə də tər gül dəstəsi qoydu.
Həmin gün Prezident sarayında Xorvatiya Respublikasının Prezidenti Stepan Mesiçin rəsmi qarşılanma mərasimi olmuşdur.
Azərbaycanın rəsmi şəxsləri Xorvatiya Prezidenti Stepan Mesiçə, Xorvatiya nümayəndə heyətinin üzvləri Azərbaycan Prezidenti İlham Əliyevə təqdim edildi.
Rəsmi qarşılanma mərasimindən sonra Azərbaycan Respublikasının Prezidenti İlham Əliyevin və Xorvatiya Respublikasının Prezidenti Stepan Mesiçin təkbətək görüşü olmuşdur.
Görüşdə ölkələrimiz arasında ikitərəfli əlaqələrin müxtəlif sahələrdə uğurla inkişaf etdiyi vurğulandı, iqtisadi əməkdaşlığın genişlənməsi üçün yaxşı potensialın mövcud olduğu bildirildi.
Prezidentlər əminliklə vurğuladılar ki, ölkələrimizin iqtisadi və digər sahələrdə əlaqələri bundan sonra da genişlənəcəkdir. Azərbaycan və Xorvatiya beynəlxalq təşkilatlar çərçivəsində də əməkdaşlıq edir.
Görüşdə qarşılıqlı maraq doğuran bir sıra məsələlər də müzakirə olundu.
Daha sonra Prezident sarayında Azərbaycan Prezidenti İlham Əliyevin və Xorvatiya Prezidenti Stepan Mesiçin nümayəndə heyətlərinin iştirakı ilə geniş tərkibdə görüşü olmuşdur.
Prezident İlham Əliyev görüşü açaraq Xorvatiya Prezidentinə müraciətlə demişdir ki, ölkələrimiz arasında siyasi əlaqələr çox sürətlə inkişaf edir. Mən iki il bundan əvvəl Sizin ölkənizə səfərimi xatırlayıram və o səfərdən sonra müxtəlif səviyyələrdə əlaqələr xeyli dərəcədə genişlənmişdir.
Sonra Xorvatiya Prezidenti Stepan Mesiç çıxış edərək demişdir ki, hər iki tərəfin çox böyük potensialı var və eyni zamanda, əməkdaşlıq üçün siyasi iradə də var. Lakin bu günə qədər hər iki ölkə arasında iqtisadi təmaslar o qədər də çox olmamışdır.
Azərbaycan Prezidenti İlham Əliyevin və Xorvatiya Prezidenti Stepan Mesiçin geniş tərkibdə görüşündən sonra dövlət başçılarının iştirakı ilə Azərbaycan-Xorvatiya sənədlərinin imzalanma mərasimi olmuşdur.
Azərbaycan Respublikası və Xorvatiya Respublikası arasında Birgə Bəyannaməni Azərbaycan Prezidenti İlham Əliyev və Xorvatiya Prezidenti Stepan Mesiç imzaladılar.
Sonra Azərbaycanın Ticarət və Sənaye Palatası və Xorvatiyanın İqtisadiyyat Palatası arasında saziş, Azərbaycan Respublikası Xarici İşlər Nazirliyi yanında Diplomatik Akademiya ilə Xorvatiya Respublikası Xarici İşlər və Avropa İnteqrasiyası Nazirliyinin Diplomatik Akademiyası arasında əməkdaşlıq haqqında saziş, Azərbaycan Respublikasının İqtisadi İnkişaf Nazirliyi və Xorvatiya Respublikasının İqtisadiyyat, Əmək və Sahibkarlıq Nazirliyi arasında əməkdaşlıq haqqında memorandum, habelə Azərbaycan Respublikası Hökuməti və Xorvatiya Respublikası Hökuməti arasında investisiyaların təşviqi və qarşılıqlı qorunması haqqında saziş imzalanmışdır.
Sənədlərin imzalanması mərasimi başa çatdıqdan sonra isə Azərbaycan Prezidenti İlham Əliyevin və Xorvatiya Prezidenti Stepan Mesiçin birgə mətbuat konfransı keçirilmişdir.
Dövlət başçıları əvvəlcə bəyanatlarla çıxış etmişlər.
Azərbaycan Prezidenti İlham Əliyev bildirmişdir ki, bu gün imzalanmış sənədlər ölkələrimiz arasında münasibətlərin inkişafı üçün böyük əhəmiyyət kəsb edir. Həm iqtisadi sazişlər, həm də ki, Birgə bəyannamə. Bəyannamədə bizim siyasi niyyətlərimiz ifadə edilir. İkitərəfli münasibətlər, bizim beynəlxalq təşkilatlarda əməkdaşlığımız əks olunur. Xorvatiya və Azərbaycan Avratlantik strukturlarına inteqrasiya siyasətini uğurla aparır. Eyni zamanda, bölgənin ən böyük təhlükə mənbəyi olan Ermənistan-Azərbaycan, Dağlıq Qarabağ münaqişəsinin həlli yolları da müştərək bəyannamədə göstərilmiş və münaqişənin ölkələrin ərazi bütövlüyü, sərhədlərin toxunulmazlığı çərçivəsində həll olunması vurğulanmışdır. Hesab edirəm ki, bu, çox önəmli məsələdir, ikitərəfli münasibətlərimizin çox vacib elementidir və əlbəttə ki, gələcək birgə fəaliyyətimizdə Bəyannamədə əks olunan bütün müddəaları həyata keçirəcəyik.
Xorvatiya Prezidenti Stepan Mesiç bəyanatında bildirmişdir ki, ikitərəfli münasibətlərin genişlənməsinin açarı iqtisadi əməkdaşlıqdır. Biz hər ikimiz razılaşırıq ki, indiki məqamda iqtisadi əməkdaşlıq lazımi səviyyədə deyil, məsələyə hər iki ölkənin obyektiv mövcud imkanları və maraqları baxımından yanaşdıqda isə, bu əməkdaşlıq qənaətbəxş deyildir. Məhz buna görə də mənimlə birlikdə Xorvatiyanın aparıcı şirkətlərinin nümayəndələri də gəlmişlər. Onlar iqtisadi forumda öz azərbaycanlı həmkarları ilə iqtisadiyyat sahəsində daha yaxşı, daha geniş və daha çoxşaxəli əməkdaşlıq imkanlarını müzakirə edəcəklər.
Sonra prezidentlər jurnalistlərin suallarına cavab verdilər.
Xorvatiya Prezidenti Stepan Mesiç oktyabrın 2-də Heydər Əliyev Fondunda olmuşdur.
Azərbaycan Prezidenti İlham Əliyev Xorvatiya Prezidentinə ümummilli liderimizin şəxsi arxivindən götürülmüş və onun fəaliyyətinin ayrı-ayrı dövrlərini əhatə edən eksponatlar barədə ətraflı məlumat verdi.
Xorvatiya Prezidenti Stepan Mesiç fenomen şəxsiyyət Heydər Əliyevin həyatının ən müxtəlif məqamlarını əks etdirən və Azərbaycan tarixinin bütöv bir dövrü barədə geniş təsəvvür yaradan çoxlu sənədlərlə, ulu öndərimiz haqqında kitablarla, dünyanın nüfuzlu siyasi, elm, mədəniyyət və incəsənət xadimlərinin, dövlət və hökumət rəhbərlərinin müstəqil Azərbaycan dövlətinin memarı və qurucusu haqqında fikirləri ilə tanış oldu, onların ümummilli liderimizlə müxtəlif görüşlərdə birgə çəkdirdikləri fotoşəkillərə böyük maraqla baxdı.
Prezidentlər Bakı-Tbilisi-Ceyhan neft kəmərinin maketinə də baxdılar. Xorvatiya Prezidenti Stepan Mesiç Fondun xatirə kitabına ürək sözlərini yazdı, görkəmli siyasi xadim Heydər Əliyevin şəxsiyyətinə dərin hörmətini ifadə etdi, Azərbaycan dövlətinin tərəqqisi naminə dəyərli fəaliyyətində Fonda uğurlar arzuladı.
Oktyabrın 3-də Bakıda, “Excelsior” mehmanxanasında Azərbaycan və Xorvatiya iş adamlarının biznes forumu keçirilmişdir.
Forum iştirakçıları Azərbaycan Prezidenti İlham Əliyevi və Xorvatiya Prezidenti Stepan Mesiçi alqışlarla qarşıladılar.
Azərbaycan və Xorvatiya prezidentləri forumun açılışında çıxış etdilər.
Azərbaycan Prezidenti İlham Əliyev çıxışında bildirmişdir ki, Prezident Mesiçlə bərabər Azərbaycana Xorvatiyadan iş adamlarından ibarət böyük bir nümayəndə heyəti də gəlmişdir. Əminəm ki, burada onlar yerli həmkarları ilə müştərək iqtisadi işlərin aparılması üçün zəruri tədbirlər görəcəklər. Mən ümid edirəm ki, bu forumdan sonra bizim aramızda çox güclü iqtisadi əlaqələr yaranacaq və iş adamlarımız hər iki ölkənin artan iqtisadi potensialından istifadə edəcəklər.
Biz hesab edirik ki, iqtisadi sahədəki əməkdaşlığımız bir neçə istiqamətdə gedə bilər. Birinci növbədə, əlbəttə, biz çox şad olardıq ki, Xorvatiyadan Azərbaycana sərmayə qoyulsun. Xüsusilə də nəzərə alsaq ki, indi bütün sahələrə sərmayə qoymaq üçün imkanlar yaxşıdır və Azərbaycana sərmayə qoymaq çox gəlirli bir işdir. İkinci istiqamət ondan ibarət ola bilər ki, Xorvatiyanın tanınmış şirkətləri Azərbaycanda müxtəlif işlərdə podratçı kimi iştirak edə bilərlər. Yenə də demək istəyirəm ki, gələn il Azərbaycanda çox böyük işlər görüləcəkdir: böyük infrastruktur layihələri, yol tikintisi, kəmərlərin tikintisi, digər infrastruktur layihələri. Xorvatiya şirkətləri bu layihələrdə fəal iştirak edə bilərlər. Eyni zamanda, Azərbaycanda müştərək müəssisələrin yaradılması da mümkündür.
Xorvatiya Prezidenti Stepan Mesiç çıxışında bildirmişdir ki, həm sizin ölkəniz, həm də bizim ölkəmiz yüksələn xətlə inkişaf edir. Mənə çox böyük təəssürat bağışlayır ki, sizin ölkə iqtisadi baxımdan göstəricilərinə görə, ötən ilin göstəricilərinə görə ən uğurlu dövlət hesab edilir. Hesab edirəm ki, əməkdaşlıq üçün müəyyən bir təşkilat, baza yaradılmalıdır ki, bunun əsasında bizim ümumi iqtisadiyyatlarımız inkişaf etsin.
Bizim öz enerji resurslarımız yoxdur. Təbii ki, biz bu baxımdan digər ölkələrdən asılıyıq. Ona görə biz digər ölkələrdən, o cümlədən sizin ölkənizdən, Azərbaycandan enerji məhsullarının idxalında maraqlıyıq. Təbii ki, Avropanın bir yox, bir çox enerji təchizatı mənbəyi olmalıdır ki, biz enerji təhlükəsizliyimizi təmin edək. Yalnız bu yolla gedərək, biz güclü iqtisadiyyatı qura bilərik.
Biz ərazi baxımından bir-birimizdən o qədər də çox fərqlənmirik. Ona görə bizim əməkdaşlıq imkanlarımız daha çoxdur. Biz keçmişdə daha böyük ölkələrin daxilində idik, indi isə müstəqil ölkələrik və biz öz potensialımıza əsaslanırıq. Bu, bizi bir-birimizə yaxınlaşdırır, birləşdirir və bir-birimizə bələdçi rolunu oynayır.
Oktyabrın 3-də Bakı Dövlət Universitetində Xorvatiya Prezidenti Stepan Mesiçin bu ali məktəbin tələbə və müəllimləri ilə görüşü olmuşdur.
Öncə Xorvatiya dövlətinin başçısı universitetdə fəaliyyət göstərən Heydər Əliyev Muzeyinin ekspozisiyası ilə tanış oldu, Fəxri qonaqlar kitabına ürək sözlərini yazdı.
Sonra Prezident Stepan Mesiç Xorvatiya dövlətçiliyinin formalaşması tarixi və müasir Xorvatiyanın xarici siyasət prioritetləri barədə məruzə ilə çıxış etdi.
Xorvatiya rəhbəri ölkəsinin Avratlantik strukturlarına inteqrasiyaya yönəlmiş siyasi xətti barədə danışarkən dedi ki, Xorvatiya ona dost ölkələrin bu istiqamətdə səylərini dəstəkləyəcəkdir. Xorvatiya bütün sahələrdə Azərbaycanla faydalı ikitərəfli əməkdaşlığın inkişafında maraqlıdır.
Xorvatiya Prezidenti beynəlxalq həyatın aktual problemləri, o cümlədən qlobal istiləşmə barədə öz ölkəsinin mövqeyini açıqladı.
Xorvatiya Prezidenti Stepan Mesiç ölkəmizə rəsmi səfəri çərçivəsində oktyabrın 3-də “Caspian Fish Co. Azerbaijan” şirkətinə gəlmiş, müəssisənin fəaliyyətilə yaxından tanış olmuşdur.
Elə həmin gün Xorvatiya Prezidenti Stepan Mesiç və onu müşayiət edən nümayəndə heyətinin üzvləri İçərişəhəri gəzmişlər.
“Azərxalça” Elmi Yaradıcılıq İstehsalat Birliyinin “Azərbaycan xalçaları” sərgi salonundan başlanmış gəzinti xalq rəssamı Kamil Əliyevin adını daşıyan Xalça muzeyi, Karvansara və Qız qalası ilə tanışlıqla davam etdirildi.
Bununla da Xorvatiya Respublikasının Prezidenti Stepan Mesiçin Azərbaycan Respublikasına rəsmi səfəri başa çatmışdır.
    © 2006 — 2007, Financial and Legal Consulting of The CIS Supported by «Marco Computer Technologies» Dizayn MEQA şirkəti tərəfindən hazırlanıb