- Azərbaycanla Azad Ticarət haqqında Sazişi olmayan ölkələrdən (o cümlədən Almaniyadan) fiziki şəxslər tərəfindən gətirilən avtonəqliyyat vasitələri Azərbaycan Respublikası Nazirlər Kabinetinin 31.05.2001-ci il tarixli 105 nömrəli qərarı ilə təsdiq edilmiş "Fiziki şəxslər tərəfindən istehsal və kommersiya məqsədləri üçün nəzərdə tutulmayan malların Azərbaycan Respublikasının gömrük sərhəddindən keçirilməsi Qaydaları"na uyğun olaraq rəsmiləşdirilir. Qaydaların 2.14.3. bəndinə əsasən ölkənin gömrük sərhəddini keçənədək istehsal-buraxılış tarixindən 1 ilədək keçmiş avtonəqliyyat vasitələrinin hər kub santimetrinə görə 0,4 ABŞ dollarına ekvivalent məbləğdə gömrük rüsumu, 2.14.4 bəndinə əsasən ölkənin gömrük sərhəddini keçənədək istehsal-buraxılış tarixindən 1 ildən çox ötmüş avtonəqliyyat vasitələri üçün isə mühərrikin həcminin hər kub santimetrinə görə 0,7 ABŞ dollarına ekvivalent məbləğdə gömrük rüsumu alınır. Eyni zamanda, həmin avtonəqliyyat vasitələrindən gömrük dəyərinin 0,15% miqdarında gömrük yığımı, nəqliyyat vasitələrinin qeydə alınması üçün vəsiqə verilməsinə görə 20 ABŞ dolları həcmində ödənc və nəqliyyat vasitəsinin gömrük dəyəri və ödənilməli olan gömrük rüsumlarının cəminin 18% həcmində əlavə dəyər vergisi tutulur.