Dövlətlərarası sərnişin daşımalarını həyata keçirən qatarların vaqon restoranlarında aparılan və gətirilən malların gömrük rəsmiləşdirilməsi Qaydaları

Dövlətlərarası sərnişin daşımalarını həyata keçirən qatarların vaqon restoranlarında aparılan və gətirilən malların gömrük rəsmiləşdirilməsi

Qaydaları

1. Ümumi müddəalar

1.1. Bu Qaydalar dövlətlərarası sərnişin daşımalarını həyata keçirən qatarlahrın vaqon restoranlarında sərnişinlərə xidmət göstərmək üçün nəzərdə tutulan ərzaq malları və digər malların gömrük rəsmiləşdirilməsini həyata keçirmək məqsədilə Azərbaycan Respublikasının Gömrük Məcəlləsinin 9-cu maddəsi, habelə gömrük işi üzrə digər qanunvericilik aktları əsasında işlənib hazırlanmışdır.

2. Dövlətlərarası sərnişin daşımalarını həyata keçirən vaqon restoranlarında keçirilən malların gömrük rəsmiləşdirilməsi qaydaları

2.1. Dövlətlərarası sərnişin daşımalarını həyata keçirən qatarların vaqon restoranlarında bilavasitə istifadə üçün aparılan və gətirilən malların gömrük rəsmiləşdirilməsi qatarların keçdiyi sərhəd keçid məntəqəsində yerləşən gömrük orqanı tərəfindən sadələşdirilmiş və güzəştli qaydada həyata keçirilir.

2.2. Azərbaycan Respublikasından aparılan malların miqdarı sərnişinlərə yol boyu xidmət etmək üçün qanunvericiliklə müəyyən edilmiş qaydada təsdiq edilmiş sənədlə göstərilən malların miqdarından artıq olmamalıdır.

2.3. Malların gömrük rəsmiləşdirilməsi vaqon restoranının möhürü və müdirinin imzası ilə təsdiq edilmiş üç nüsxədən ibarət siyahı (Əlavə № 1) və mövcud qanunvericilikdə nəzərdə tutulmuş qaydada sənədlər tərtib edilərək sadələşdirilmiş qaydada həyata keçirilir. Gömrük məqsədləri üçün həmin siyahı gömrük bəyannaməsi kimi qəbul edilə bilər. Göstərilən siyahının nüsxələri aşağıdakı qaydada paylanılır:

birinci və ikinci nüsxələr vaqon restoranın müdirində qalır;
üçüncü nüsxə isə gömrük işi üçün tələb olunan sənədlərlə birlikdə gömrük rəsmiləşdirilməsini həyata keçirən sərhəd gömrük orqanında saxlanılır.

2.4. Azərbaycan Respublikasının sərhədindən beynəlxalq sərnişin daşımalarını həyata keçirən qatarların vaqon restoranlarında aparılan malların gömrük rəsmiləşdirilməsi onlara iqtisadi siyasət tədbirləri tətbiq edilmədən, habelə gömrük rüsum və vergiləri alınmadan həyata keçirilir.

2.5. Dövlətlərarası sərnişin daşımalarını həyata keçirən qatarların vaqon restoranlarında aparılan malların gömrük rəsmiləşdirilməsi zamanı gömrük yığımlarının tutulması qüvvədə olan qanunvericiliyin tələblərinə uyğun həyata keçirilir. Gömrük rəsmiləşdirilməsi üçün alınan yığımların miqdarı barədə əlavə 1-də göstərilən siyahının 5-ci qrafasında qeydiyyat aparılır və gömrük rəsmiləşdirilməsini aparan sərhəd gömrük orqanının vəzifəli şəxsinin imzası və şəxsi nömrəli möhürü ilə təsdiq olunur.

2.6. Həmin malların gömrük rəsmiləşdirilməsini həyata keçirən sərhəd gömrük orqanının vəzifəli şəxsi mövcud qanunvericilikdə nəzərdə tutulmuş qaydada gömrük nəzarətini və rəsmiləşdirilməsini həyata keçirdikdən sonra malların buraxılması haqqında qərar qəbul edir və əlavə 1-də göstərilən siyahının 5-ci qrafasına «Buraxılsın» ştampı vuraraq gömrük rəsmiləşdirilməsini aparan sərhəd gömrük orqanının vəzifəli şəxsinin imzası və şəxsi nömrəli möhürü ilə təsdiq olunur.

2.7. Azərbaycan Respublikasının ərazisindən aparılan zaman sərhəd gömrük orqanı tərəfindən rəsmiləşdirilmiş siyahıda göstərilən malların satılmayan hissəsi geri qaytarıldıqda vaqon-restoran müdirində saxlanılmış əlavə 1-də göstərilən siyahının 1-ci və 2-ci nüsxələrinin 6-cı və 7-ci qrafaları doldurularaq sərhəd gömrük orqanının vəzifəli şəxsinə təqdim olunur. Sərhəd gömrük orqanının vəzifəli şəxsi həmin əlavə 1-də göstərilən siyahının 6-cı və 7-ci qrafalarında göstərilən məlumatların vaqon restoranda olan malların faktiki miqdarına çeşidinə uyğunluğunu yoxlayır, satılmayan malların gömrük rəsmiləşdirilməsi zamanı gömrük yığımlarının tutulması qüvvədə olan qanunvericiliyin tələblərinə uyğun qaydada həyata keçirilir. Gömrük rəsmiləşdirilməsi üçün alınan yığımların miqdarı barədə 8-ci qrafada qeydiyyat edilir və malların buraxılması haqqında qərar qəbul edildikdən sonra həmin qrafada «Buraxılışın» ştampı vurularaq gömrük rəsmiləşdirilməsini aparan sərhəd gömrük orqanının vəzifəli şəxsinin imzası və şəxsi nömrəli möhürü ilə təsdiq edilir. Siyahının bir nüsxəsi sərhəd gömrük orqanında saxlanılır, ikinci nüsxəsi isə vaqon restoranın müdirinə qaytarılır.

2.8. Dövlətlərarası sərnişin daşımalarını həyata keçirən qatarların vaqon restoranlarında bilavasitə istifadə üçün Azərbaycan Respublikası ərazisindən kənarda alınmış mallar respublikaya gətirilərkən həmin malların mövcud qanunvericilikdə nəzərdə tutulmuş qaydada gömrük rəsmiləşdirilməsi xarici iqtisadi fəaliyyətin tarif və qeyri-tarif tənzimlənməsi tədbirləri tətbiq edilməklə həyata keçirilir.

3. Yekun müddəalar

3.1. Dövlətlərarası sərnişin daşımalarını həyata keçirən qatarların vaqon restoranlarında Azərbaycan Respublikasının ərazisinə gətirilən və bu ərazidən aparılan mallar gömrük orqanlarında bəyan olunmadığı təqdirdə, həmin malların dövlət sərhədindən keçirilməsinə cavabdeh olan şəxslər mövcud qanunvericiliyin tələblərinə uyğun olaraq məsuliyyətə cəlb olunur və mallar barəsində qanuna müvafiq tədbirlər həyata keçirilir.

Əlavə 1

Dövlətlərarası sərnişin daşımalarını həyata keçirən qatarların vaqon restoranlarında aparılan və gətirilən malların siyahısı