Fiziki şəxslər tərəfindən Azərbaycan Respublikasının milli valyutasının, milli valyutada qiymətli kağızların və digər valyuta sərvətlərinin Azərbaycan Respublikasının gömrük sərhədindən keçirilməsi Qaydaları haqqında Qərar № 95

Azərbaycan Respublikasının Nazirlər Kabineti

Fiziki şəxslər tərəfindən Azərbaycan Respublikasının milli valyutasının, milli valyutada qiymətli kağızların və digər valyuta sərvətlərinin Azərbaycan Respublikasının gömrük sərhədindən keçirilməsi Qaydaları haqqında

Qərar № 95

Bakı şəhəri, 28 aprel 1998-ci il

Azərbaycan Respublikasının gömrük sərhədindən Azərbaycan Respublikasının milli valyutasının, milli valyutada qiymətli kağızların və digər valyuta sərvətlərinin keçirilməsinin tənzimlənməsi məqsədli ilə «Valyuta tənzimi haqqında» Azərbaycan Respublikası Qanununun 9-cu maddəsinin 2-ci bəndinə uyğun olaraq Azərbaycan Respublikasının Nazirlər Kabineti qərara alır:

1. Azərbaycan Respublikasının Milli Bankı ilə birgə hazırlanmış «Fiziki şəxslər tərəfindən Azərbaycan Respublikasının milli valyutasının, milli valyutada qiymətli kağızların və digər valyuta sərvətlərinin Azərbaycan Respublikasının gömrük sərhədindən keçirilməsi Qaydaları» təsdiq edilsin (əlavə olunur).

2. Azərbaycan Respublikası Nazirlər Kabinetinin 1994-cü il 12 oktyabr tarixli 359 №-li qərarı qüvvədən düşmüş hesab edilsin.

3. Bu Qərar imzalandığı gündən qüvvəyə minir.

Azərbaycan Respublikasının Baş naziri

A.RASİ-ZADƏ.

«Azərbaycan Respublikasının Qanunvericilik Toplusu»nda dərc olunmuşdur (30 aprel 1998-ci il, № 4, maddə 303) («AzerSoft»).

17 may 2002-ci il tarixli 79 nömrəli qərara əsasən 2-ci bənd istisna olmaqla qüvvədən düşmüşmüşdür («AzerSoft»)

Azərbaycan Respublikası
Nazirlər Kabinetinin 1998-ci il 28 aprel tarixli
95 nömrəli qərarı ilə təsdiq edilmişdir.

1. Ümumi müddəalar

1.1. Bu Qaydalar «Valyuta tənzimi haqqında» Azərbaycan Respublikası Qanununun müddəalarına uyğun olaraq Azərbaycan Respublikasının Milli Bankı ilə birgə hazırlanmış və fiziki şəxs olan rezidentlər tərəfindən Azərbaycan Respublikasının milli valyutasının, milli valyutada qiymətli kağızların və digər valyuta sərvətlərinin Azərbaycan Respublikasının gömrük sərhədindən keçirilməsi qaydalarını müəyyən edir.

1.2. Bu Qaydalarda aşağıdakı anlayışlardan istifadə edilir:

1.2.1. Azərbaycan Respublikasının milli valyutası — tədavüldə olan, eləcə də tədavüldən çıxarılan, lakin tədavüldə olan pul nişanlarına dəyişdirilə bilən Azərbaycan Respublikası Milli Bankının bank biletləri (banknotları) şəklində olan manat və sikkələr;

1.2.2. milli valyutada qiymətli kağızlar — manatla ifadə edilmiş ödəniş sənədləri (çeklər, veksillər, akkreditivlər və s.) fond sərvətləri (səhmlər, istiqrazlar) və digər borc öhdəlikləri;

1.2.3. xarici valyuta — müvafiq xarici dövlətin və ya dövlətlər qrupunun ərazisində tədavüldə olan və qanuni ödəniş vasitəsi sayılan, eləcə də tədavüldən çıxarılmış və ya çıxarılan, lakin həmin ərazidə tədavüldə olan pul nişanlarına dəyişdirilə bilən banknotlar, xəzinə biletləri və sikkələr şəklində pul nişanları;

1.2.4. valyuta sərvətləri:

xarici valyuta;
xarici valyutada ifadə olunmuş ödəniş sənədləri (yol çekləri, veksellər və s.) və digər borc öhdəlikləri;
qiymətli metallar — zərgərlik, digər məişət məmulatı və bu məmulatların qırıntıları istisna olmaqla, hər hansı növdə və halda olan qızıl, gümüş, platin və platin qrupundan olan metallar (palladium, iridium, rodium, rutenium və osmium);

1.2.5. fiziki şəxs olan rezidentlər (bundan sonra rezidentlər) — Azərbaycan Respublikasında daimi yaşayış yeri olan, o cümlədən Azərbaycan Respublikası hüdudlarından kənarda müvəqqəti qalan fiziki şəxslər;

1.2.6. fiziki şəxs olan qeyri-rezidentlər (bundan sonra qeyri-rezidentlər) — Azərbaycan Respublikası hüdudlarından kənarda daimi yaşayış yeri olan, o cümlədən Azərbaycan Respublikasında müvəqqəti qalan fiziki şəxslər;

1.2.7. müvəkkil banklar — valyuta əməliyyatlarının aparılması üçün Azərbaycan Respublikası Milli Bankının lisenziyasını almış banklar və digər kredit təşkilatları.

2. Rezidentlər tərəfindən valyuta sərvətlərinin Azərbaycan Respublikasının gömrük sərhədindən keçirilməsi

2.1. Rezidentlər valyuta sərvətlərini gömrük orqanlarında bəyan etməklə heç bir məhdudiyyət qoyulmadan Azərbaycan Respublikasının ərazisinə gətirə bilərlər.

10000 (on min) ABŞ dollarınadək məbləğdə valyuta sərvətlərinin Azərbaycan Respublikasının ərazisinə gətirilməsi «Sərnişin gömrük bəyannaməsi» ilə 10000 (on min) ABŞ dollarından yuxarı məbləğdə valyuta sərvətlərinin Azərbaycan Respublikasının ərazisinə gətirilməsi isə, «Sərnişin gömrük bəyannaməsi» və «gömrük vəsiqəsi» (sertifikat) ilə rəsmiləşdirilir.

Dövlət Gömrük Komitəsi Azərbaycan Respublikasının ərazisinə gətirilən valyuta sərvətləri haqqında məlumatları hər ay hesabat ayından sonra gələn ayın 20-dək Maliyyə Nazirliyinə və Milli Banka göndərir.

2.2. Rezidentlər tərəfindən Azərbaycan Respublikasının ərazisinə əvvəllər gətirilmiş valyuta sərvətləri (fond sərvətləri istina olmaqla) «Sərnişin gömrük bəyannaməsi» (valyuta sərvətlərinin məbləği 10000 (on min) ABŞ dollarınadək olarsa) və «Sərnişin gömrük bəyannaməsi» ilə «gömrük vəsiqəsi» (valyuta sərvətlərinin məbləği 10000 (on min) ABŞ dollarından yuxarı olduqda) gömrük orqanlarına təqdim olunmaqla çıxarıla bilər.

Əvvəllər Azərbaycan Respublikasının ərazisinə köçürülmüş və gətirilmiş valyuta sərvətlərindən 10000 (on min) ABŞ dollarınadək məbləğ Milli Bankın təsdiq etdiyi formada müvəkkil bankların təqdim etdikləri arayışlar əsasında nağd şəkildə Azərbaycan Respublikasının ərazisindən sərbəst və haqq ödənilmədən çıxarıla bilər.

2.3. Azərbaycan Respublikasının ərazisindən adambaşına 1000 (bir min) ABŞ dolları məbləğində valyuta sərvətləri heç bir sənəd təqdim edilmədən, gömrük orqanlarında bəyan edilmək şərti ilə sərbəst və haqq ödənilmədən çıxarıla bilər.

2.4. 1000 (bir min) ABŞ dollarından əlavə 9000 (doqquz min) ABŞ dollarınadək məbləğində valyuta sərvətləri (fond sərvətləri istisna olmaqla) onların nominal dəyərinin 1%-i həcmində haqq ödənilmək şərti ilə Azərbaycan Respublikasının ərazisindən çıxarıla bilər.

2.5. Valyuta sərvətlərinin ölkə ərazisindən çıxarılması üçün haqlar müvafiq ərazi gömrük orqanlarının kassasına ödənilməli və Dövlət Gömrük Komitəsi tərəfindən yığılan haqların, tam həcmdə və vaxtında dövlət büdcəsinə köçürülməsi təmin olunmalıdır.

2.6. Xarici ölkələrə xidməti ezamiyyətə gedən rezidentlərin, həmin şəxsləri ezamiyyətə göndərən təşkilatlara xidmət göstərən müvəkkil bankların təsdiqedici sənədlərində göstərilmiş məbləğlərdə ezamiyyə və nümayəndəlik xərclərinin ödənilməsi üçün apardıqları xarici valyuta sərvətlərindən gömrük haqqı tutulmur.

3. Qeyri-rezidentlər tərəfindən valyuta sərvətlərinin Azərbaycan Respublikasının gömrük sərhədindən keçirilməsi

3.1. Qeyri-rezidentlər tərəfindən valyuta sərvətlərinin Azərbaycan Respublikasının gömrük sərhədindən keçirilməsi «Valyuta tənzimi haqqında» Azərbaycan Respublikası Qanununun 11-ci maddəsinin müddəalarına əsasən tənzimlənir.

4. Azərbaycan Respublikasının milli valyutasının və milli valyuta qiymətli kağızların Azərbaycan Respublikasının gömrük sərhədindən keçirilməsi

4.1. Müvəqqəti olaraq xaricə gedən Azərbaycan Respublikasının vətəndaşları gömrük bəyannaməsində qeyd olunmaqla, Azərbaycan Respublikasının ərazisinə qaytarılmaq şərtilə 50000 manat məbləğində milli valyutada vəsait apara bilər.

4.2. Azərbaycan Respublikasını müvəqqəti və daimi tərk edən fiziki şəxslər, həmçinin qeyri-rezidentlər tərəfindən milli valyutanın, özəlləşdirmə çeklərinin və opsionlarının Azərbaycan Respublikasının ərazisindən çıxarılmasına yol verilmir.

5. Məsuliyyət

Bu Qaydaların müddəalarını pozanlar Azərbaycan Respublikasının mövcud qanunvericiliyinə uyğun olaraq məsuliyyət daşıyırlar.