Gömrük brokeri haqqında Əsasnamə

1. Ümumi müddəalar

1.1. Gömrük brokeri (vasitəçi) — Azərbaycan Respublikasının qanunvericiliyinə uyğun olaraq yaradılmış, «Müəssisələr haqqında» Azərbaycan Respublikasının Qanununa uyğun olaraq fəaliyyət göstərən və Azərbaycan Respublikasının «Gömrük Məcəlləsi»nin və bu Əsasnamənin müddəalarına əsasən gömrük brokeri fəaliyyəti üçün Azərbaycan Respublikasının Dövlət Gömrük Komitəsindən müəyyən olunmuş qaydada lisenziya almış hüquqi şəxsdir.

1.2. Gömrük brokerinin fəaliyyəti, onun təmsil etdiyi şəxsin tapşırığı ilə və onun hesabına öz adından malların və nəqliyyat vasitələrinin gömrük rəsmiləşdirilməsi əməliyyatlarının həyata keçirilməsindən və gömrük işi sahəsində digər vasitəçilik funksiyalarının yerinə yetirilməsindən ibarətdir.

2. Gömrük brokerinin fəaliyyəti

2.1. Gömrük brokerinin fəaliyyəti aşağıdakıları əhatə edir:

3. Gömrük brokerinin vəzifələri

3.1. Gömrük brokerinin vəzifələri aşağıdakılardan ibarətdir:

3.1.1. Azərbaycan Respublikasının Dövlət Gömrük Komitəsi tərəfindən müəyyən olunmuş forma üzrə və müddətlərdə mallar və nəqliyyat vasitələri, onların gömrük rejimləri haqqında, habelə gömrük məqsədləri üçün zəruri olan digər məlumatların gömrük orqanlarına bildirilməsi;

3.1.2. Azərbaycan Respublikası gömrük orqanlarının tələbi ilə bəyan edilən malların və nəqliyyat vasitələrinin təqdim edilməsi;

3.1.3. Azərbaycan Respublikasının gömrük orqanlarına sənədlərin və gömrük məqsədləri üçün zəruri olan əlavə məlumatların təqdim edilməsi;

3.1.4. təmsil etdiyi şəxsdən alınmış sənədlərin və gömrük məqsədləri üçün zəruri olan məlumatların düzgünlüyünün yoxlanması;

3.1.5. Azərbaycan Respublikası gömrük orqanlarının tələbi ilə malların və nəqliyyat vasitələrinin gömrük rəsmiləşdirilməsində iştirak etmək və bunun həyata keçirilməsində gömrük orqanlarına yardım göstərilməsi;

3.1.6. Azərbaycan Respublikası gömrük orqanlarının tələbi ilə təmsil etdiyi şəxsin hesabına gömrük nəzarətindən keçirilməli olan malların və nəqliyyat vasitələrinin daşınmasının, çəkilməsinin və ya miqdarının digər şəkildə təyin edilməsinin, yüklənməsinin, boşaldılmasının, yenidən yüklənməsinin, zədələnmiş qabların düzəldilməsinin, qablaşdırılmasının, açılmasının və ya yenidən qablaşdırılmasının, həmçinin binaların, tutarların və göstərilən malların və nəqliyyat vasitələrinin ola biləcəyi yerlərin açılmasının həyata keçirilməsi;

3.1.7. gömrük ödənişlərinin düzgün hesablanması;

3.1.8. gömrük brokeri ilə və onun təmsil etdiyi şəxs arasında bağlanmış müqavilədə gömrük ödənişləri nəzərdə tutulduğu hallarda, bəyan edilən mallar və nəqliyyat vasitələri üzrə gömrük ödənişləri gömrük brokeri tərəfindən ödənilməsinin, digər hallarda isə gömrük brokerinin təmsil etdiyi şəxs və ya hər bir marağı olan şəxs tərəfindən ödənilməsinin təmin edilməsi.

Azərbaycan Respublikasının gömrük sərhədindən malları və nəqliyyat vasitələrini keçirən şəxs özü deklarant olmadığı hallarda, bu şəxs gömrük ödənişlərinin ödənilməsi üzrə gömrük brokeri ilə bərabər eyni məsuliyyət daşıyır;

3.1.9. Azərbaycan Respublikasının qanunvericiliyinə zidd olmayan formalarda təmsil olunan şəxs tərəfindən, yaxud 3.1.8 yarımbəndində göstərilməyən hallarda üçüncü şəxslər tərəfindən gömrük ödənişlərinin vaxtında və tam ödənilməsinin həyata keçirilməsi;

3.1.10. gömrük brokeri tərəfindən bəyan edilən mallar və nəqliyyat vasitələri barəsində baytarlıq, fito-sanitar və digər icra hakimiyyəti orqanları tərəfindən aparılan başqa dövlət nəzarəti növlərinin həyata keçirilməsinin təmin edilməsi;

3.1.11. mallar və nəqliyyat vasitələri buraxılanadək, yaxud onlar seçilmiş gömrük rejiminə uyğun olaraq təmsil olunan şəxsin sərəncamına verilənədək, barəsində gömrük rəsmiləşdirilməsi başa çatmamış mallardan və nəqliyyat vasitələrindən istifadəyə və onlar üzərində sərəncam verilməsinə aid şərtlərə və məhdudyyətlərə əməl olunması;

3.1.12. gömrük brokeri tərəfindən bəyan edilmiş malların və nəqliyyat vasitələrinin uçotunun aparılması, Azərbaycan Respublikasının Dövlət Gömrük Komitəsi tərəfindən müəyyən olunmuş qaydada Azərbaycan Respublikasının gömrük orqanına bu cür mallar və nəqliyyat vasitələri və bunlarla apardığı əməliyyatlar haqqında hesabat verilməsi;

3.1.13. gömrük brokeri tərəfindən istifadə olunan avtomatik informasiya vasitələrinin və proqram məhsullarının, Azərbaycan Respublikasının gömrük orqanları tərəfindən istifadə olunan avtomatik informasiya vasitələri və proqram məhsulları ilə uzlaşmasının təmin edilməsi;

3.1.14. hər hansı bir aşkar edilmiş dəyişiklik, məhv olma, tara və qablaşdırmanın zədələnməsi, malların onlar barəsində nəqliyyat, kommersiya və digər sənədlərdəki məlumatlara uyğun gəlməməsi, müxtəlif sənədlərdə mallara aid məlumatların uyğunsuzluğu və gömrük işinə aid buna bənzər hallar barədə gömrük orqanlarını xəbərdar etmək;

3.1.15. gömrük məqsədləri üçün təmsil etdiyi şəxsdən aldığı informasiyadan müstəsna olaraq bu məqsədlər üçün istifadə edilməsi;

4. Gömrük brokerinin təmsil etdiyi şəxslərlə qarşılıqlı münasibətləri

4.1. Gömrük brokerinin təmsil etdiyi şəxslərlə qarşılıqlı münasibətləri, onlar arasında bağlanmış müqavilə əsasında qurulur.

4.2. Gömrük brokeri ona müraciət etmiş hər hansı bir şəxsə, həmin şəxsin hərəkətinin və ya hərəkətsizliyinin qanunvericiliyə zidd olması və qanunvericilik aktlarının müddəalarına əsasən məsuliyyətə cəlb olunacağı barədə kifayət qədər əsaslar olmağı halda, bu Əsasnamədə nəzərdə tutulan digər hallar istisna olmaqla, gömrük brokeri xidməti üzrə qarşılıqlı münasibətlər barədə müqavilə bağlamağa borcludur.

4.3. Bağlanmış müqavilədə, gömrük brokerinin təmsil etdiyi şəxsin hərəkətində və hərəkətsizliyində qanunvericiliyə zidd və qanunvericilik aktlarının müddəalarına əsasən məsuliyyətə cəlb olunacağı barədə gömrük brokerinin kifayət dərəcədə əsasları olduğu halda müqavilənin pozulması barədə müddəa yazılmalıdır.

Müqavilə, Azərbaycan Respublikasının Gömrük Məcəlləsində nəzərdə tutulmuş, gömrük bəyannaməsinin geri götürülməsi hüququna xitam verilməsi anına qədər pozulduğu hallarda gömrük brokeri gömrük qaydalarının pozulması üzrə məsuliyyət daşımır. Müqavilənin bu andan sonra pozulması gömrük brokerinin gömrük qaydalarının pozulmasına görə məsuliyyətdən azad etmir.

4.4. Gömrük brokerinin təmsil etdiyi şəxs gömrük brokeri ilə malların və nəqliyyat vasitələrinin bəyan edilməsi barədə bağladığı müqaviləni, bu mallar və nəqliyyat vasitələri haqqında məlumatlar bildirilmiş bəyannamənin geri götürülməsi hüququna xitam verilməsi anından sonra poza bilməz.

4.5. Təmsil etdiyi şəxsin gömrük rəsmiləşdirilməsi üzrə əməliyyatların həyata keçirilməsi tapşırığına malik olan gömrük brokeri gömrük orqanları qarşısında malların və nəqliyyat vasitələrinin gömrük rəsmiləşdirilməsində gömrük qaydalarının pozulmasına görə məsuliyyət daşıyır.

4.6. Gömrük brokerinin təmsil etdiyi şəxs gömrük işi sahəsində bu Əsasnamənin 1.2 yarımbəndində göstərilən funksiyaların yalnız bütövlükdə yerinə yetirilməsinə dair gömrük brokerinə tapşırıq verə bilər. Mallar və nəqliyyat vasitələri barəsində bir neçə gömrük brokerinə verilmiş eyni funksiyaların yerinə yetirilməsi barədə tapşırığa, yaxud gömrük brokerinin səlahiyyətlərinin yalnız bu funksiyaların bir hissəsinin yerinə yetirilməsi ilə və ya bir funksiya həddində bir sıra əməliyyatların həyata keçirilməsi ilə məhdudlaşdırılmasına yol verilmir.

4.7. Azərbaycan Respublikasının gömrük orqanları tərəfindən əsas gömrük rəsmiləşdirilməsi bağlandıqdan sonra gömrük işi sahəsində bu Əsasnamənin 1.2 yarımbəndində göstərilən eyni funksiyaların yerinə yetirilməsi barədə tapşırığın bir neçə gömrük brokerinə verilməsi aşkar edilərsə, təmsil etdiyi şəxsin lazımi dərəcədə tapşırığı olan və gömrük rəsmiləşdirilməsi üzrə birinci olaraq hüquqi əhəmiyyətli iş görmüş brokerə, gömrük brokeri kimi baxılır.

4.8. Gömrük brokerinin təmsil etdiyi şəxslərlə gömrük brokeri xidməti üzrə qarşılıqlı münasibətlər barədə bağladığı müqavilələr notarial qaydada təsdiq olunmalıdır.

5. Gömrük brokerinin hüquqları

Gömrük brokerinin hüquqları aşağıdakılardır:

5.1. malların və nəqliyyat vasitələrnin gömrük rəsmiləşdirilməsində Azərbaycan Respublikasının gömrük qanunvericiliyində nəzərdə tutulmuş qaydada gömrük orqanlarının vəzifəli şəxsləri tərəfindən prob və nümunələrin götürülməsi zamanı iştirak etmək;

5.2. gömrük nəzarəti altında mallara və nəqliyyat vasitələrinə baxış keçirmək, onların çəkilməsini təmin etmək və digər üsulla miqdarını müəyyən etmək, habelə Azərbaycan Respublikası gömrük orqanının icazəsi ilə malların prob və nümunələrini götürmək (gömrük nəzarəti olan mallardan prob və nümunələrin götürülməsi haqqında Dövlət Gömrük Komitəsinin müəyyən etdiyi formada akt tərtib olunur);

Azərbaycan Respublikasının ərazisindən çıxarılan mallar üzrə göstərilən əməliyyatlar gömrük rəsmiləşdirilməsinə qədər yerinə yetirildikdə, bu cür icazə tələb olunmur.

5.3. mallardan götürülmüş prob və nümunələrin Azərbaycan Respublikasının gömrük orqanları tərəfindən aparılmış ekspertizasının nəticələri ilə tanış olmaq;

5.4. mallardan prob və nümunələrin götürülməsi ilə əlaqədar xərclərin Azərbaycan Respublikasının gömrük qanunvericiliyinə uyğun olaraq təmsil etdiyi şəxsin hesabına ödənilməsini təmin etmək;

5.5. malların və nəqliyyat vasitələrinin məhv olması, həmişəlik itirilməsi və ya əhəmiyyətli dərəcədə korlanması üçün real təhlükə istisna edilməklə, Azərbaycan Respublikasının gömrük orqanlarının nəzarəti altında və yalnız Azərbaycan Respublikası Dövlət Gömrük Komitəsinin icazəsi ilə malların və nəqliyyat vasitələrinin eyniləşdirilməsini həyata keçirmək, eyniləşdirmək vasitələrini dəyişdirmək, kənarlaşdırmaq, məhv etmək;

5.6. Azərbaycan Respublikasının gömrük orqanının icazəsi ilə gömrük nəzarəti zonalarına daxil olmaq hüququ olan işçilərin siyahısını tərtib etmək və Azərbaycan Respublikasının qanunvericiliyinə uyğun olaraq bu zonalarda gömrük rəsmiləşdirilməsi üzrə əməliyyatların həyata keçirilməsi üçün zəruri olan xidməti otaqlara malik olmaq;

5.7. təmsil etdiyi şəxsdən gömrük məqsədləri üçün zəruri olan kommersiya, bank və ya qanunla qorunan digər sirri və yaxud gizli informasiyanı daxil edən sənədlərin və məlumatların təqdim edilməsini tələb etmək və bu cür sənədləri və məlumatları Azərbaycan Respublikasının gömrük qanunvericiliyinin tələblərinə əməl edilməsini təmin edən müddətlərdə almaq;

5.8. Azərbaycan Respublikasının Dövlət Gömrük Komitəsi tərəfindən müəyyən edilmiş hallarda və qaydada Azərbaycan Respublikasının gömrük orqanları qarşısında təmsil etdiyi şəxsin öz öhdəliklərinin lazımi qaydada yerinə yetirilməsi üzrə zamin qismində çıxış etmək və bu şəxslərin ayrı-ayrı kateqoriyalarına müqavilənin qiyməti və digər şərtləri barəsində güzəştlər vermək;

5.9. Azərbaycan Respublikası Dövlət Gömrük Komitəsinin Azərbaycan Respublikası Gömrük Məcəlləsinin müddəalarına uyğun olaraq müəyyən etdiyi qaydada Azərbaycan Respublikasının gömrük orqanlarından məlumatlar və məsləhətlər almaq, gömrük məntəqəsindən ötrü istifadə olunan informasiya şəbəkələrinə daxil olmaq;

5.10. müəyyən olunmuş qaydada Azərbaycan Respublikası gömrük orqanlarının və onların vəzifəli şəxslərinin qərarlarından, hərəkət və hərəkətsizliyindən əsaslanmış şikayət etmək;

5.11. Azərbaycan Respublikasının qanunvericiliyində nəzərdə tutulmuş digər hüquqlar.

6. Gömrük brokerinin məsuliyyəti

1. Bu Əsasnamənin pozulmasına görə gömrük brokeri mövcud qanunvericiliyə uyğun olaraq məsuliyyət daşıyır.

2. Gömrük nəzarəti və gömrük rəsmiləşdirilməsi həyata keçirərkən gömrük brokeri Azərbaycan Respublikasının gömrük sərhədindən müstəqil olaraq malları keçirən şəxs kimi bütün vəzifələri yerinə yetirir və həmin şəxs kimi tam məsuliyyət daşıyır.

3. Dövlət Gömrük Komitəsindən ixtisas attestatını almış mütəxəssis gömrük rəsmiləşdirilməsi ilə əlaqədar əməliyyatları gömrük brokeri adından yerinə yetirdikdə, o, bu iş üçün gömrük brokeri tərəfindən vəkil edilmiş hesab olunur və gömrük brokerinin bunun əksini sübut etdiyi hallar istisna edilir.

Azərbaycan Respublikasında gömrük brokeri fəaliyyətinə xüsusi razılıq (lisenziya) verilməsi Qaydaları

1. Ümumi müddəalar

1.1. Bu Qaydalar «Sahibkarlıq fəaliyyəti haqqında» Azərbaycan Respublikasının Qanununa, Azərbaycan Respublikası Prezidentinin 1997-ci il 27 yanvar tarixli 543 nömrəli Fərmanı ilə təsdiq edilmiş «Bəzi sahibkarlıq fəaliyyəti növlərinə xüsusi razılıq (lisenziya) verilməsi haqqında Əsasnamə»yə və «Xüsusi razılıq (lisenziya) tələb olunan fəaliyyət növlərinin siyahısının təsdiq edilməsi haqqında» Azərbaycan Respublikası Prezidentinin 1997-ci il 4 oktyabr tarixli 637 nömrəli Fərmanına əsasən hazırlanmışdır və gömrük brokeri kimi fəaliyyət göstərmək üçün xüsusi razılıq (lisenziya) verilməsi (bundan sonra lisenziya) qaydalarını müəyyən edir.

1.2. Bu Qaydalara əsasən Azərbaycan Respublikasının Dövlət Gömrük Komitəsi (bundan sonra Dövlət Gömrük Komitəsi) tərəfindən Azərbaycan Respublikasının hüquqi şəxslərinə (bundan sonra «ərizəçilər») gömrük brokeri fəaliyyəti üçün verilən lisenziya rəsmi sənəddir.

1.3. Ərizəçilər yalnız bu Qaydalara əsasən lisenziya aldıqdan sonra gömrük brokeri kimi fəaliyyətini gömrük işi haqqında qanunvericiliyə və Azərbaycan Respublikasının Nazirlər Kabineti tərəfindən təsdiq edilmiş «Gömrük brokeri haqqında Əsasnamə»yə uyğun olaraq həyata keçirə bilərlər.

1.4. Lisenziyanın sahibi verilən lisenziyadan yalnız özü istifadə edə bilər, onu başqa şəxslərə verə bilməz və bu lisenziyanın qüvvəsi lisenziya sahibinin təsisçisi olduğu hüquqi şəxslərə, lisenziyanın sahibi ilə birgə fəaliyyət, o cümlədən onunla birgə əməkdaşlıq barədə bağlanmış müqavilə əsasında fəaliyyət göstərən başqa şəxslərə şamil edilmir.

2. Lisenziyanın verilməsi

2.1. Lisenziya almaq üçün ərizəçi Dövlət Gömrük Komitəsinə aşağıdakı sənədləri təqdim etməlidir:

3. Lisenziya

3.1. Lisenziyada aşağıdakılar göstərilir:

3.1.1. Dövlət Gömrük Komitəsinin adı;

3.1.2. lisenziya verilən müəssisə, təşkilat və idarənin adı və hüquqi ünvanı;

3.1.3. həyata keçirilməsinə lisenziya verilən fəaliyyət növü;

3.1.4. lisenziyanın qüvvədə olma müddəti;

3.1.5. müvafiq fəaliyyət növünün həyata keçirilməsi qaydası;

3.1.6. lisenziyanın qeydiyyat nömrəsi və verilmə tarixi.

3.2. Lisenziyalar Dövlət Gömrük Komitəsinin sədri və yaxud onu əvəz edən şəxs tərəfindən imzalanır, imza Dövlət Gömrük Komitəsinin gerb möhürü ilə təsdiq edilir.

4. Lisenziyanın müddəti

4.1. Lisenziya 3 il müddətinə verilir.

4.2. Lisenziyanın qüvvədə olma müddətinin uzadılması onun verilməsi üçün müəyyən olunmuş qaydada həyata keçirilir.

4.3. Müddəti bitmiş lisenziyalar etibarsız hesab edilir.

5. Lisenziyanın qüvvədə olma qaydaları və nəzarət

5.1. Bu Qaydalara əsasən lisenziya sahibləri gömrük brokerinin fəaliyyətini həyata keçirərkən aşağıdakı qaydalara riayət etməlidirlər:

5.1.1. ştatında gömrük rəsmiləşdirilməsi üçün ixtisas attestasiyasına malik olan mütəxəssislərin olmasını təmin etmək;

5.1.2. mövcud qanunvericiliyə uyğun olaraq öz fəaliyyəti üçün sığorta müqaviləsini bağlamaq;

5.1.3. gömrük brokeri kimi fəaliyyət göstərmək üçün kifayət qədər maddi-texniki təchizata malik olmaq;

5.1.4. gömrük nəzarəti altında olan mallarla aparılan əməliyyatları dəqiq və dolğun əks etdirən uçot və hesabat aparılmasını təmin etmək;

5.1.5. lisenziyada göstərilmiş fəaliyyət növünü mövcud qanunvericilik və normativ aktlarının müddəalarına uyğun olaraq həyata keçirmək;

5.1.6. kommersiya sirri olan və ya digər gizli məlumatlardan qanunsuz istifadə edilməsinə yol verməmək;

5.1.7. gömrük işi haqqında qanunvericilik və normativ aktlarına və bu Qaydalara riayət etmək.

5.2. Lisenziyanın qüvvədə olma qaydalarına nəzarəti gömrük işi haqqında qanunvericilik və normativ aktlarına uyğun olaraq Dövlət Gömrük Komitəsi həyata keçirir.

5.3. Nəzarət qaydasında Dövlət Gömrük Komitəsinin səlahiyyətlərinə aşağıdakılar daxildir:

5.3.1. lisenziyada göstərilən fəaliyyət növünün həyata keçirilməsini tənzimləyən normativ-hüquqi aktlara və lisenziya qaydalarına riayət edilməsini yoxlamaq;

5.3.2. yoxlama zamanı ortaya çıxan suallara aid lisenziya sahibindən məlumatlar, arayışlar tələb etmək;

5.3.3. yoxlamanın nəticələrinə dair pozuntuları və onların aradan qaldırılması müddəti göstərilməklə akt tərtib etmək;

5.3.4. aşkar edilmiş pozuntuların aradan qaldırılması barədə lisenziya sahibinə xəbərdarlıq etmək.

5.4. Lisenziya sahibi aparılan yoxlama zamanı Dövlət Gömrük Komitəsinin nümayəndələrinə yoxlamanın aparılması üçün zəruri olan normal şərait yaratmağa və tələb olunan sənədləri təqdim etməyə borcludur.

5.5. Gömrük orqanları yoxlamanın nəticəsi barədə iki nüsxədə akt tərtib edirlər, akt gömrük brokeri və gömrük orqanının nümayəndələri tərəfindən imzalanır. Aktı imzalamaqdan imtina edildikdə bu barədə aktda qeyd edilir. Akta lisenziya sahibinin izahatı əlavə edilir. Aktın bir nüsxəsi lisenziya sahibində qalır.

5.6. Dövlət Gömrük Komitəsi zəruri olduqda müvafiq təşkilatların nümayəndələrini gömrük işi haqqında normativ-hüquqi aktlarına və bu Qaydalara uyğun nəzarət qaydasında aparılan yoxlamalara cəlb edə bilər.

6. Lisenziyanın fəaliyyətinin dayandırılması və ya ləğv edilməsi

6.1. Gömrük brokeri fəaliyyətinə verilmiş lisenziya Dövlət Gömrük Komitəsi tərəfindən aşağıdakı hallarda dayandırılır:

6.1.1. lisenziya sahibi tərəfindən müvafiq ərizə təqdim edildikdə;

6.1.2. lisenziya sahibi tərəfindən normativ aktlara əməl edilmədikdə, yaxud Azərbaycan Respublikasının qanunvericiliyinə uyğun olaraq müvafiq dövlət orqanları tərəfindən lisenziya sahibinin fəaliyyəti dayandırıldıqda;

6.1.3. lisenziya sahibinin müflisləşməsi faktı Azərbaycan Respublikasının qanunvericiliyi ilə təsdiq edildikdə;

6.1.4. gömrük işi haqqında qanunvericilik və normativ aktlarına uyğun olaraq gömrük brokerinin fəaliyyəti üçün tələb olunan zəruri şəraitin və şərtlərin pozulduğu aşkar edildikdə;

6.1.5. Azərbaycan Respublikasının qanunvericiliyində nəzərdə tutulan digər hallarda.

6.2. Dövlət Gömrük Komitəsi lisenziyanın fəaliyyətinin dayandırılması haqqında qərar qəbul etdiyi andan 5 gün müddətində yazılı şəkildə lisenziyanın sahibinə və dövlət vergi xidməti orqanlarına məlumat verir.

Lisenziyanın fəaliyyətinin dayandırılmasına səbəb olan hallar dəyişildikdə lisenziyanın fəaliyyəti lisenziyanın sahibinin müraciətinə əsasən bərpa edilə bilər. Dövlət Gömrük Komitəsi tərəfindən bu barədə qərar qəbul edildikdə lisenziyanın fəaliyyəti bərpa edilmiş hesab olunur, həmin qərar qəbul edilmiş andan 5 gün müddətində lisenziyanın sahibinə və dövlət vergi xidməti orqanlarına məlumat verilir.

6.3. Lisenziya aşağıdakı hallarda ləğv edilir:

6.3.1. lisenziya sahibi tərəfindən müvafiq ərizə təqdim edildikdə;

6.3.2. lisenziya verilməsi üçün təqdim edilən sənədlərdə düzgün olmayan məlumatlar aşkar edildikdə;

6.3.3. lisenziyanın qüvvədə olma qaydaları lisenziya sahibi tərəfindən pozulduqda;

6.3.4. məhkəmənin müvafiq qərarı olduqda;

6.3.5. lisenziya almış hüquqi şəxs ləğv edildikdə;

6.3.6. gömrük brokeri gömrük işi haqqında qanunvericilik və normativ aktlarının tələblərinə riayət etmədikdə;

6.3.7. Azərbaycan Respublikasının qanunvericiliyində nəzərdə tutulan digər hallarda.

6.4. Dövlət Gömrük Komitəsi lisenziyanın ləğv edilməsi haqqında qərar qəbul etdiyi andan 5 gün müddətində yazılı şəkildə lisenziyanın sahibinə və dövlət vergi xidməti orqanlarına məlumat verir.

6.5. Lisenziya ləğv edildikdə və ya onun fəaliyyəti dayandırıldıqda lisenziyanın verilməsinə görə alınmış haqlar lisenziya sahibinə qaytarılmır.

6.6. Dövlət Gömrük Komitəsi verdiyi, qeydə aldığı, dayandırdığı, bərpa etdiyi və ləğv etdiyi lisenziyaların reyestrini aparır.

7. Məsuliyyət

1. Dövlət Gömrük Komitəsinin rəhbərləri və vəzifəli şəxsləri lisenziyalaşdırma haqqında Azərbaycan Respublikasının qanunvericiliyinin pozulması, yaxud onun lazımi şəkildə icra olunmamasına görə mövcud qanunvericiliyə uyğun olaraq məsuliyyət daşıyırlar.

2. Dövlət Gömrük Komitəsinin qərarlarından və hərəkətlərindən müəyyən olunmuş qaydada məhkəmə orqanlarına şikayət oluna bilər.

3. Bu Qaydalarda göstərilən gömrük brokerinin fəaliyyətini lisenziyasız həyata keçirənlər mövcud qanunvericiliyə uyğun olaraq məsuliyyət daşıyırlar.