1. Ümumi müddəalar

1.1. Bu Qaydalar «Sahibkarlıq fəaliyyəti haqqında» Azərbaycan Respublikasının Qanununa, Azərbaycan Respublikası Prezidentinin 1997-ci il 27 yanvar tarixli 543 nömrəli Fərmanı ilə təsdiq edilmiş «Bəzi sahibkarlıq fəaliyyəti növlərinə xüsusi razılıq (lisenziya) verilməsi haqqında Əsasnamə»yə və «Xüsusi razılıq (lisenziya) tələb olunan fəaliyyət növlərinin siyahısının təsdiq edilməsi haqqında» Azərbaycan Respublikası Prezidentinin 1997-ci il 4 oktyabr tarixli 637 nömrəli Fərmanına əsasən hazırlanmışdır və gömrük daşıyıcısı fəaliyyətinə xüsusi razılıq (lisenziya) verilməsi (bundan sonra lisenziya) qaydalarını müəyyən edir.

1.2. Bu Qaydalara əsasən Azərbaycan Respublikasının qanunvericiliyinə uyğun olaraq yaradılmış, «Müəssisələr haqqında» Azərbaycan Respublikasının Qanununa uyğun olaraq fəaliyyət göstərən hüquqi şəxslərə (bundan sonra ərizəçilər) gömrük daşıyıcısı fəaliyyəti üçün Azərbaycan Respublikasının Dövlət Gömrük Komitəsi (bundan sonra Dövlət Gömrük Komitəsi ) tərəfindən verilən lisenziya rəsmi sənəddir.

1.3. Ərizəçilər yalnız bu Qaydalara əsasən lisenziya aldıqdan sonra gömrük daşıyıcısı kimi fəaliyyətini gömrük işi haqqında qanunvericiliyə və Dövlət Gömrük Komitəsi tərəfindən təsdiq edilmiş Əsasnaməyə uyğun olaraq həyata keçirə bilərlər.

1.4. Lisenziyanın sahibi verilən lisenziyadan yalnız özü istifadə edə bilər, onu başqa şəxslərə verə bilməz və bu lisenziyanın qüvvəsi lisenziya sahibinin təsisçisi olduğu hüquqi şəxslərə, lisenziyanın sahibi ilə birgə fəaliyyət, o cümlədən onunla birgə əməkdaşlıq barədə bağlanmış müqavilə əsasında fəaliyyət göstərən başqa şəxslərə şamil edilmir.

2. Lisenziyanın verilməsi

2.1. Lisenziya almaq üçün ərizəçi Dövlət Gömrük Komitəsinə aşağıdakı sənədləri təqdim etməlidir:

3. Lisenziya

3.1. Lisenziyada aşağıdakılar göstərilir:

3.1.1. Dövlət Gömrük Komitəsinin adı;

3.1.2. lisenziya verilən müəssisə, təşkilat və idarənin adı və hüquqi ünvanı;

3.1.3. həyata keçirilməsinə lisenziya verilən fəaliyyət növü;

3.1.4. lisenziyanın qüvvədə olma müddəti;

3.1.5. müvafiq fəaliyyət növünün həyata keçirilməsi qaydası;

3.1.6. lisenziyanın qeydiyyat nömrəsi və verilmə tarixi.

3.2. Lisenziyalar Dövlət Gömrük Komitəsinin sədri və yaxud onu əvəz edən şəxs tərəfindən imzalanır, imza Dövlət Gömrük Komitəsinin gerb möhürü ilə təsdiq edilir.

4. Lisenziyanın müddəti

4.1. Lisenziya 3 il müddətinə verilir.

4.2. Lisenziyanın qüvvədə olma müddətinin uzadılması onun verilməsi üçün müəyyən olunmuş qaydada həyata keçirilir.

4.3. Müddəti bitmiş lisenziyalar etibarsız hesab edilir.

5. Lisenziyanın qüvvədə olma qaydaları və nəzarət

5.1. Bu Qaydalara əsasən lisenziya sahibləri gömrük daşıyıcısı fəaliyyətini həyata keçirərkən aşağıdakı qaydalara riayət etməlidirlər:

5.1.1. mülkiyyətində və ya icarəsində 3 ildən az olmayaraq götürülmüş və tələb olunan təchizata malik kifayət sayda nəqliyyat vasitələrinin olmasını təmin etmək;

5.1.2. mövcud qanunvericiliyə uyğun olaraq öz fəaliyyəti üçün sığorta müqaviləsini bağlamaq;

5.1.3. gömrük daşıyıcısı kimi qeydə alındığı yer üzrə Azərbaycan Respublikasının gömrük orqanının fəaliyyət zonasında gömrük rəsmiləşdirilməsi yerinə 24 saat müddətində heç olmazsa bir nəqliyyat vasitəsinin gəlməsini təmin etmək;

5.1.4. lisenziyada göstərilmiş fəaliyyət növünü mövcud qanunvericilik və normativ aktlarının, Dövlət Gömrük Komitəsinin təsdiq etdiyi Əsasnamənin müddəalarına uyğun olaraq həyata keçirmək;

5.1.5. gömrük işi haqqında qanunvericilik və normativ aktlarına və bu Qaydalara riayət etmək.

5.2. Lisenziyanın qüvvədə olma qaydalarına nəzarəti gömrük işi haqqında qanunvericilik və normativ aktlarına uyğun olaraq Dövlət Gömrük Komitəsi həyata keçirir.

5.3. Nəzarət qaydasında Dövlət Gömrük Komitəsinin səlahiyyətlərinə aşağıdakılar daxildir:

5.3.1. lisenziyada göstərilən fəaliyyət növünün həyata keçirilməsini tənzimləyən normativ-hüquqi aktlara və lisenziya qaydalarına, Dövlət Gömrük Komitəsi tərəfindən gömrük daşıyıcısının fəaliyyəti barədə təsdiq olunmuş Əsasnamənin müddəalarına riayət edilməsini yoxlamaq;

5.3.2. yoxlama zamanı ortaya çıxan suallara, o cümlədən gömrük daşıyıcısı fəaliyyəti üçün istifadə olunan nəqliyyat vasitələrinin vəziyyətinə aid məlumat və arayışları lisenziya sahiblərindən tələb etmək;

5.3.3. yoxlamanın nəticələrinə dair pozuntuları və onların aradan qaldırılması müddəti göstərilməklə akt tərtib etmək;

5.3.4. aşkar edilmiş pozuntuların aradan qaldırılması barədə lisenziya sahibinə xəbərdarlıq etmək.

5.4. Lisenziya sahibi aparılan yoxlama zamanı Dövlət Gömrük Komitəsinin nümayəndələrinə yoxlamanın aparılması üçün zəruri olan normal şərait yaratmağa, gömrük daşıyıcısı üçün istifadə olunan nəqliyyat vasitələrini və tələb olunan sənədləri təqdim etməyə borcludur.

5.5. Gömrük orqanları yoxlamanın nəticəsi barədə iki nüsxədə akt tərtib edirlər, akt gömrük daşıyıcısı və gömrük orqanının nümayəndələri tərəfindən imzalanır. Aktı imzalamaqdan imtina edildikdə bu barədə aktda qeyd edilir. Akta lisenziya sahibinin izahatı əlavə edilir. Aktın bir nüsxəsi lisenziya sahibində qalır.

5.6. Dövlət Gömrük Komitəsi zəruri olduqda müvafiq təşkilatların nümayəndələrini gömrük işi haqqında normativ-hüquqi aktlarına və bu Qaydalara uyğun nəzarət qaydasında aparılan yoxlamalara cəlb edə bilər.

6. Lisenziyanın fəaliyyətinin dayandırılması və ya ləğv edilməsi

6.1. Gömrük daşıyıcısı fəaliyyətinə verilmiş lisenziya Dövlət Gömrük Komitəsi tərəfindən aşağıdakı hallarda dayandırılır:

6.1.1. lisenziya sahibi tərəfindən müvafiq ərizə təqdim edildikdə;

6.1.2. lisenziya sahibi tərəfindən normativ aktlara əməl edilmədikdə, yaxud Azərbaycan Respublikasının qanunvericiliyinə uyğun olaraq müvafiq dövlət orqanları tərəfindən lisenziya sahibinin fəaliyyəti dayandırıldıqda;

6.1.3. lisenziya sahibinin müflisləşməsi faktı Azərbaycan Respublikasının qanunvericiliyi ilə təsdiq edildikdə;

6.1.4. gömrük işi haqqında qanunvericilik və normativ aktlarına uyğun olaraq gömrük daşıyıcısı fəaliyyətinin həyata keçirilməsində tələb olunan zəruri şəraitin və şərtlərin pozulduğu aşkar edildikdə;

6.1.5. Azərbaycan Respublikasının qanunvericiliyində nəzərdə tutulan digər hallarda.

6.2. Dövlət Gömrük Komitəsi lisenziyanın fəaliyyətinin dayandırılması haqqında qərar qəbul etdiyi andan 5 gün müddətində yazılı şəkildə lisenziyanın sahibinə və dövlət vergi xidməti orqanlarına məlumat verir.

Lisenziyanın fəaliyyətinin dayandırılmasına səbəb olan hallar dəyişildikdə lisenziyanın fəaliyyəti lisenziyanın sahibinin müraciətinə əsasən bərpa edilə bilər. Dövlət Gömrük Komitəsi tərəfindən bu barədə qərar qəbul edildikdə lisenziyanın fəaliyyəti bərpa edilmiş hesab olunur, həmin qərar qəbul edilmiş andan 5 gün müddətində lisenziyanın sahibinə və dövlət vergi xidməti orqanlarına məlumat verilir.

6.3. Lisenziya aşağıdakı hallarda ləğv edilir:

6.3.1. lisenziya sahibi tərəfindən müvafiq ərizə təqdim edildikdə;

6.3.2. lisenziya verilməsi üçün təqdim edilən sənədlərdə düzgün olmayan məlumatlar aşkar edildikdə;

6.3.3. lisenziyanın qüvvədə olma qaydaları lisenziya sahibi tərəfindən pozulduqda;

6.3.4. məhkəmənin müvafiq qərarı olduqda;

6.3.5. lisenziya almış hüquqi şəxs ləğv edildikdə;

6.3.6. lazımi qaydada təchiz olunmamış nəqliyyat vasitəsindən istifadə edildikdə, o cümlədən daşınmaya görə müəyyən edilən haqq göstərilən xidmətin orta dəyərinə uyğun gəlmədikdə; mallar və onların sənədlərinin daşınmasından əsassız olaraq imtina edilməsi də daxil olmaqla bir neçə dəfə gömrük daşıyıcısı öz öhdəliklərini yerinə yetirmədikdə;

6.3.7. gömrük işi haqqında qanunvericilikdə nəzərdə tutulmuş hüquq pozuntuları bir neçə dəfə törədildikdə;

6.3.8. mallar və onlara dair sənəd göndərənlərə qeyri-qanuni olaraq mühüm ziyan gətirildiyi, o cümlədən kommersiya və digər sirlər olan məlumatlardan qanunsuz istifadə edilməsi təsdiq olunduqda;

6.3.9. gömrük daşıyıcısı gömrük işi haqqında qanunvericilik və normativ aktlarının tələblərinə riayət etmədikdə;

6.3.10. Azərbaycan Respublikasının qanunvericiliyində nəzərdə tutulan digər hallarda.

6.4. Dövlət Gömrük Komitəsi lisenziyanın ləğv edilməsi haqqında qərar qəbul etdiyi andan 5 gün müddətində yazılı şəkildə lisenziyanın sahibinə və dövlət vergi xidməti orqanlarına məlumat verir.

6.5. Lisenziya ləğv edildikdə və ya onun fəaliyyəti dayandırıldıqda lisenziyanın verilməsinə görə alınmış haqlar lisenziya sahibinə qaytarılmır.

6.6. Dövlət Gömrük Komitəsi verdiyi, qeydə aldığı, dayandırdığı, bərpa etdiyi və ləğv etdiyi lisenziyaların reyestrini aparır.

7. Məsuliyyət

1. Dövlət Gömrük Komitəsinin rəhbərləri və vəzifəli şəxsləri lisenziyalaşdırma haqqında Azərbaycan Respublikasının qanunvericiliyinin pozulması, yaxud onun lazımi şəkildə icra olunmamasına görə mövcud qanunvericiliyə uyğun olaraq məsuliyyət daşıyırlar.

2. Dövlət Gömrük Komitəsinin qərarlarından və hərəkətlərindən müəyyən olunmuş qaydada məhkəmə orqanlarına şikayət oluna bilər.

3. Bu Qaydalarda göstərilən gömrük daşıyıcısının fəaliyyəti lisenziyasız həyata keçirənlər mövcud qanunvericiliyə uyğun olaraq məsuliyyət daşıyırlar.