Dövrü gömrük bəyannaməsinin verilməsi, tətbiqi və sənədləşdirilməsi
Qaydaları

1. Ümumi müddalar

1.1. Bu qaydalar sərhədyanı rayonlarda yaşayan fiziki şəxslər, yəni Azərbaycan Respublikasının vətəndaşları, vətəndaşlığı olmayan və xarici vətəndaşlar tərəfindən Azərbaycan Respublikasının gömrük buraxılış postlarından istehsalat və kommersiya fəaliyyəti üçün nəzərdə tutulmayan mallar şəxsi nəqliyyat vasitələri ilə eyni bir şəxs tərəfindən müntəzəm (daimi) olaraq keçirildikdə, bir dövrü gömrük bəyannaməsinin verilməsi, tətbiqi və sənədləşdirilməsi qaydalarını tənzimləyir.

1.2. Fiziki şəxslər bu Qaydalarla və Azərbaycan Respublikasının gömrük məsələsinə aid digər normativ aktları ilə müəyyən olunmuş qaydada Azərbaycan Respublikası ərazisindən aparılması və Azərbaycan Respublikası ərazisinə gətirilməsi qadağan olunmuş və icazəsi müvafiq orqanlar tərəfindən verilən mallar istisna olmaqla istənilən malları Azərbaycan Respublikasının gömrük buraxılış postlarından keçirə bilərlər.

2. Dövrü gömrük bəyannaməsinin verilməsi üçün tələb olunan sənədlər:

2.1. Dövrü gömrük bəyannaməsi verilməsi üçün fiziki şəxs sərhəd gömrük buraxılış postunun rəisinin adına ərizə ilə müraciət edir.

2.2. Fiziki şəxs ərizə ilə birlikdə şəxsiyyəti təsdiq edən sənədin və nəqliyyat vasitəsinin texniki sənədinin surətlərini təqdim etməlidir.

3. Dövrü gömrük bəyannaməsinin verilməsi və istifadə müddəti:

3.1. Dövrü gömrük bəyannaməsinin verilməsinə icazə fiziki şəxsin ərizəsi üzərinə gömrük buraxılış postunun rəisi tərəfindən müvafiq dərkənar qoyulduqdan sonra verilir.

3.2. Dövrü gömrük bəyannaməsi 3 (üç) aydan artıq olmayan müddətə verilir və ondan istifadə bu müddətdən artıq olmamalıdır.

3.3. Gömrük buraxılış postunun rəisi dövrü gömrük bəyannaməsinin verilməsinə icazə verdikdən sonra, fiziki şəxs dövrü gömrük bəyannaməsini doldurur və gömrük nəzarətini həyata keçirmək üçün gömrük nəzarətini həyata keçirən gömrük əməkdaşına təqdim edir.

4. Dövrü gömrük bəyannaməsinin doldurulması qaydası:

4.1. Dövrü gömrük bəyannaməsi (bundan sonra «bəyannamə») fiziki şəxslərə məxsus olan mallara və əşyalara gömrük nəzarətini həyata keçirən zaman tətbiq olunur.

4.2. Eyni mallar və nəqliyyat vasitələri sərhədyanı rayonlarda yaşayan eyni bir fiziki şəxs tərəfindən müntəzəm olaraq (hər gün və ya tez-tez) eyni gömrük buraxılış postundan keçirildikdə, gömrük orqanının icazə verdiyi müddət ərzində bir nüsxədən ibarət bəyannamə imza etməklə doldurulur.

4.3. 16 yaşına çatmış hər bir şəxsin bəyannamə doldurması nəzərdə tutulur. 16 yaşına çatmamış şəxslərə məxsus mallar haqda məlumat onlarla birlikdə gedən şəxslərin bəyannamələrində göstərilir.

4.4. Bəyannamədə bütün qrafalar doldurulmalı, «hə» və ya «yox» yazılmış damaların üstündən xətt çəkməklə bütün suallara cavab verilməlidir. Məlumatlar bəyannaməyə sağışmadıqda əlavə vərəqlərdən istifadə etmək olar. Bu zaman 1-ci bənddəki məlumatlar əlavə vərəqlərdə təkrar olunmalı, istifadə olunmayan boş qalmış yerlərin isə üstündən xətt çəkilməlidir.

4.5. Bəyannamənin 1-ci bəndində nəzərdə tutulan məlumatlar pasportdan götürülür.

4.6. Bəyannamənin 3.1 və 4.1 bəndlərindəki malların və əşyaların təsviri, imkan daxilində onların hazırladıqları materialların səciyyəvi xüsusiyyətləri, qiymətli metalların əyyarları (probları), rəngləri, formaları, markaları və s. göstərilməklə yerinə yetirilir 4.1 maddəsində malların və əşyaların dəyəri ABŞ dollarında və yaxud da milli valyutada göstərilir.

4.7. Gömrük nəzarəti başa çatdıqdan sonra bəyannamə gömrük nəzarətini həyata keçirən gömrükxana əməkdaşının şəxsi nömrəli möhürü ilə təsdiqlənir. Gömrükxana əməkdaşının şəxsi nömrəli möhürü gömrük bəyannaməsinin 3.1 maddəsində və bəyannamənin arxa tərəfinin axırına vurulur.

4.8. Bəyannamə gömrük rəsmiləşdirilməsi aparan gömrük əməkdaşı tərəfindən nömrələnir və qeydiyyat jurnalında qeyd edilərək gömrük orqanları tərəfindən icazə verilmiş müddət ərzində hər dəfə gömrük ərazisindən keçdikdə gömrük orqanına təqdim etmək üçün fiziki şəxsə qaytarılır.

4.9. Gömrük orqanı əməkdaşının təsdiq etdiyi bəyannamə orada göstərilən malların və əşyaların maneəsiz gətirilməsi, yaxud uyğun olaraq çıxarılması üçün mal və əşya sahibinin özünə verilir.

4.10. Bəyannamənin «Xidməti qeydlər» qrafası aşağıdakı məqsədlər üçün istifadə oluna bilər:

5. Son müddəalar

5.1. Azərbaycan Respublikasının Gömrük Məcəlləsinin 175-ci maddəsinə əsasən hazırlanmış bu Qaydaların tələblərinin yerinə yetirilməməsinə görə gömrük əməkdaşları İntizam Nizamnaməsində və eləcə də qanunvericilikdə nəzərdə tutulan qaydada məsuliyyət daşıyırlar.