III. Respublikanın gömrük ərazisindən təkrar ixrac edilən malların rəsmiləşdirilməsi

3.1. Azərbaycan Respublikasının gömrük ərazisinə təkrar ixrac üçün gətirilmiş malların bu ərazinin hüdudlarından kənara aparılması bilavasitə gömrük rəsmiləşdirilməsini aparan gömrük orqanları tərəfindən qanunvericilikdə müəyyən olunmuş qaydada həyata keçirilir.

3.2. Naxçıvan Muxtar Respublikasında malların təkrar ixracına icazəni Naxçıvan MR Gömrük Komitəsi verir.

3.3. «İcazə vərəqəsi» almaq üçün Dövlət Gömrük Komitəsinə (Naxçıvan MR Gömrük Komitəsinə) edilmiş müraciət ilə birlikdə aşağıdakı sənədlər təqdim edilməlidir:

• təkrar ixrac məqsədilə gətirilmiş malların idxal yük-gömrük bəyannaməsi;
• yol-nəqliyyat sənədləri (qaimə);
• invoys əmtəə dəyərini əks etdirən sənəd;
• bağlanmış müqavilə;
• malın keyfiyyət və mənşə sertifikatları;
• malın dəyərinin qabaqcadan ödənilməsi və ya akreditiv açılması barədə bank sənədi;
• təkrar ixrac məqsədilə gətirilmiş malı rəsmiləşdirmiş gömrük əməkdaşının şəxsi nömrəli möhürü ilə təsdiq olunmuş yazılı rəyi;
• malların təkrar ixracına icazə verilməsi üçün zəruri olan digər sənədlər.

3.4. Təkrar ixrac üçün edilmiş müraciətə 10 (on) gün müddətində baxılmalıdır.

3.2. Malların təkrar ixrac gömrük rejimi altında rəsmiləşdirilməsi üçün təqdim olunan sənədlərin düzgünlüyünə məsuliyyəti deklarant və yaxud gömrük brokeri daşıyır.

3.6. «İcazə vərəqəsi» üç nüsxədə verilir. Bir nüsxə Gömrük Komitəsində saxlanılır, digər nüsxələr ərizəçiyə qaytarılır (bir nüsxə malı rəsmiləşdirən gömrük orqanına ərizəçi tərəfindən təqdim edilir).

3.3. Azərbaycan Respublikasının qanunvericilik aktlarında və Azərbaycan Respublikasının dövlətlərarası müqavilələrində müəyyən edilən digər hallarda isə müvafiq icra hakimiyyəti orqanının icazəsi ilə malların təkrar ixrac gömrük rejimi altında rəsmiləşdirilməsi gömrük orqanı tərəfindən qanuna müvafiq qaydada həyata keçirilir.

3.4. Təkrar ixrac məqsədilə gətirilmiş malların Azərbaycan Respublikasının hüdudlarından kənara aparılmasını rəsmiləşdirən gömrük orqanı sərhəd çıxış gömrükxanasına məlumat verir. Sərhəd gömrük orqanı həmin malın gömrük ərazisindən çıxarılıb-çıxarılmaması barədə 3 (üç) gün müddətində malı təkrar ixrac gömrük rejimi altında rəsmiləşdirən gömrük orqanına cavab verməlidir. Göstərilən müddət ərzində təkrar ixrac məqsədilə gətirilmiş malların Azərbaycan Respublikasının ərazisindən çıxarılması faktı təsdiq edilmədikdə (və ya məlumat daxil olmadıqda) malı rəsmiləşdirən gömrük orqanı müvafiq tədbirlər görməlidir.

3.5. Malların təkrar ixrac gömrük rejimi altında gömrük rəsmiləşdirilməsi zamanı YGB-nin doldurulması Gömrük Komitəsinin 17.06.1998-ci il tarixli 027 saylı əmri ilə təsdiq edilmiş «Yük gömrük bəyannamələrinin doldurulması Qaydaları»nın və 02.06.1999-cu il tarixli 037 saylı əmri ilə təsdiq edilmiş «Təkrar ixrac gömrük rejimi altında yerləşdirilmiş mallara yük gömrük bəyannaməsinin doldurulması Qaydaları»nın tələblərinə uyğun həyata keçirilir.