Bakı şəhəri, 16 iyun 1997-ci il

Azərbaycan Respublikasında ixrac və idxal əməliyyatlarının gömrük mexanizmi vasitəsilə tənzimlənməsinin təkmilləşdirilməsi, ixrac potensialının artırılması və ixracın həvəsləndirilməsi, ölkə istehsalçılarının mənafelərinin qorunması və daxili bazarın ehtiyaclarının ödənilməsi məqsədilə Azərbaycan Respublikasının Nazirlər Kabineti qərara alır:

1. Azərbaycan Respublikası Dövlət Gömrük Komitəsinin təqdim etdiyi və əlaqədar təşkilatlarla razılaşdırılmış « Gömrük xidmətləri göstərilməsi üçün alınan ödənclər haqqında təlimat» (əlavə № 1) və « Gömrük xidmətlərinin göstərilməsi üçün alınan ödənclərin ta`rifləri» (əlavə № 2) təsdiq edilsin.

2. Müəyyən edilsin ki:

2.1. İxrac olunan mallar, onların növlərindən asılı olmayaraq gömrük ixrac rüsumuna cəlb olunmur.

2.2. Azərbaycan Respublikası ərazisinə bu qərarın 3 nömrəli əlavəsində göstərilən siyahı üzrə gətirilən mallar, onların mənşə ölkəsindən asılı olmayaraq gömrük idxal rüsumuna cəlb olunmur.

2.3. Azərbaycan Respublikası ərazisinə bu qərarın 4 nömrəli əlavəsində göstərilən siyahı üzrə gətirilən mallar, onların mənşə ölkəsindən asılı olmayaraq gömrük dəyərinin 5 faizi həcmində idxal rüsumuna cəlb olunur.

2.4. Bu qərarın 2.2 və 2.3 yarımbəndlərində göstərilən mallar, habelə 3-cü bəndində göstərilən məqsədlər üçün gətirilən və idxal gömrük rüsumunun « 0» (sıfır) dərəcəsinə cəlb olunan mallar istisna olmaqla, idxal olunan digər mallar, həmin malların mənşə ölkəsindən və növündən asılı olmayaraq, onların gömrük dəyərinin 15 faizi həcmində gömrük idxal rüsumlarına cəlb olunur.

3. Müəyyən edilsin ki, « 0» (sıfır) dərəcəsi ilə gömrük idxal rüsumuna cəlb olunan mallar aşağıdakılardır:

3.1. Kənd təsərrüfatı üçün gətirilən toxum, gübrə, yem, damazlıq heyvanlar, dərman preparatları, baytarlıq təbabətində tətbiq olunan dərman, bioloji preparatlar və baytarlıq ləvazimatları.

3.2. Qablaşdırılmış uşaq yeməkləri, şprislər, əczaçılıq məhsulları.

3.3. Azərbaycan Respublikasında təmsil olunan diplomatik nümayəndəliklərin və onlara bərabər tutulan təşkilatların yalnız rəsmi istifadəsi, habelə bu nümayənlikdələrin diplomatik və inzibati-texniki heyəti üzvlərinin, o cümlədən onlarla birgə yaşayan ailə üzvlərinin yalnız şəxsi istifadəsi üçün nəzərdə tutulan mallar və məlak.

3.4. Azərbaycan Respublikası ərazisində mövcud qaydada qeydiyyatdan keçmiş humanitar təşkilatlar, həmçinin Beynəlxalq Humanitar Yardım üzrə Respublika Komissiyasının razılığı ilə digər hüquqi və fiziki şəxslər tərəfindən gətirilən təmənnasız olaraq paylanılması nəzərdə tutulmuş humanitar yardım.

3.5. Beynəlxalq təşkilatların xətti ilə təmənnasız texniki yardım kimi gətirilən mallar.

3.6. Əlilliyin profilaktikası və müalicəsi məqsədləri üçün istifadə olunacaq (avtonəqliyyat vasitələri istisna olmaqla) müxtəlif texniki vasitələr və onların istehsalı üçün xammal və komplektləşdirici məmulatlar.

3.7. Müsadirə edilmə, sahibsizlik və həmçinin varislik hüququ əsasında dövlətin mülkiyyətinə keçirilməsi üçün gətirilən mallar.

3.8. Birgə müəssisənin nizamnamə fonduna xarici investorun əmanəti kimi və ya tamamilə xarici investora məxsus müəssisənin yaradılması üçün Azərbaycan Respublikası ərazisinə gətirilən əmlak.

3.9. Azərbaycan Respublikası ərazisinə müvəqqəti olaraq gətirilmiş və gətirilmə şərtlərinə görə müəyyən olunmuş müddətdə dəyişiklik edilmədən gətirildiyi ölkəyə aparılası mallar (gömrük orqanlarına malların gətirildiyi ölkəyə qaytarılacağı barədə öhdəlik təqdim edildiyi və yaxud gömrük rüsumları ödənildiyi təqdirdə. Mallar Azərbaycan Respublikası ərazisindən çıxarıldıqda ödənilmiş gömrük rüsumları ödəyicilərə geri qaytarılır).

3.10. Tranzit mallar (gömrük orqanlarının nəzarəti altında).

3.11. Rüsumsuz ticarət mağazaları üçün gətirilən mallar.

3.12. Xarici investisiya qoyulmuş müəssisələrin əcnəbi işçilərinin yalnız öz ehtiyacları üçün Azərbaycan Respublikasına gətirdikləri əmlak.

3.13. Maliyyə Nazirliyi və ya Milli Bankın təsdiq edici sənədi əsasında gətirilən qanuni tədiyyə vasitələrindən olan valyuta, pullar, banknotlar (numizmatika məqsədilə istifadə olunanlardan başqa), rəsmi dövlət sənəd blankları, vətəndaş pasportları, habelə qiymətli kağızlar.

3.14. Təkrar ixrac məqsədilə, həmçinin emal edilməsi üçün müvəqqəti olaraq Azərbaycan Respublikası ərazisinə gətirilən mallar (malların təkrar ixrac üçün üçüncü ölkəyə dəyişdirilmədən aparılması, emaldan sonra ixracı barədə gömrük orqanlarına bank zəmanəti təqdim edildiyi və yaxud gömrük rüsumları ödənildiyi təqdirdə. Mallar təkrar ixrac üçün, həmçinin emal olunandan sonra Azərbaycan Respublikası ərazisindən çıxarıldıqda ödənilmiş gömrük rüsumları ödəyicilərə geri qaytarılır.)

3.15. Dövlət büdcəsi hesabına idxal olunan mallar (Azərbaycan Respublikası Maliyyə Nazirliyinin təsdiqedici sənədi əsasında).

3.16. Xəzər dənizi hövzəsində Azərbaycan Respublikasının kvotası hesabına ovlanmış və Respublika ərazisinə gətirilən balıq və balıq məhsulları.

3.17. Beynəlxalq təşkilatların, xarici dövlətlərin hökumətlərinin, habelə dövlətlərarası və hökumətlərarası sazişlərə əsasən xarici hüquqi və fiziki şəxslərin ayırdıqları əvəzsiz maliyyə yardımları, kreditlər və borclar hesabına idxal olunan mallar, işlər, xidmətlər.

4. Nəzərə alınsın ki, Azərbaycan Respublikasında bu qərarın 3.3, 3.8 və 3.12 yarımbəndlərində göstərilən mallar satılarsa, həmin malların satıldığı andan 10 gün müddətində gömrük rüsumları ödənilməlidir.

Göstərilən malları satan müəssisələr bu barədə əvvəlcədən gömrük orqanlarına məlumat verir, əks təqdirdə onlara qarşı qanunvericilikdə nəzərdə tutulmuş qaydada tədbirlər görülür.

5. Azərbaycan Respublikası Hökumətinin xarici ölkələrlə azad ticarət haqqında sazişləri olduğu təqdirdə ikitərəfli razılığa əsasən idxal olunan mallara gömrük rüsumları tətbiq edilmir.

6. Müəyyən edilsin ki, bu qərarın 1-ci bəndi ilə təsdiq edilmiş « Gömrük xidmətləri göstərilməsi üçün alınan ödənclər haqqında Təlimat» a əsasən yığılan vəsaitin 65 faizi Dövlət Gömrük Komitəsinin hesabında saxlanılır və onun maddi-texniki bazasının inkişafına, zəruri texniki avadanlıqların və vasitələrin alınmasına yönəldilir.

7. İdxal əməliyyatları üzrə alınan gömrük rüsumlarının dövlət büdcəsinə tam həcmdə və vaxtında köçürülməsi Dövlət Gömrük Komitəsi və müvəkkil banklar tərəfindən təmin edilsin.

8. Dövlət Gömrük Komitəsi bu qərarın icrası ilə əlaqədar müvafiq təlimatlar hazırlasın, Maliyyə Nazirliyi ilə razılaşdıraraq təsdiq etsin və müvafiq tədbirlər həyata keçirsin.

9. Azərbaycan Respublikası Nazirlər Kabinetinin 1995-ci il 24 aprel tarixli 90 nömrəli (9-cu bənd istisna olmaqla), 1995-ci il 1 may tarixli 104 nömrəli, 1996-cı il 16 mart tarixli 29 nömrəli, 1996-cı il 16 dekabr tarixli 178 nömrəli qərarları, həmçinin 1997-ci il 18 fevral tarixli 36s nömrəli sərəncamı qüvvəsini itirmiş hesab edilsin.

10. Bu qərar 1997-ci il iyulun 1-dən etibarən qüvvəyə minir.

Azərbaycan Respublikasının Baş naziri

A.RASİ-ZADƏ.

15 iyul 1997-ci il tarixli 79 saylı əlavələrlə.

22 aprel 1998-ci il tarixli 91 saylı Qərara əsasən qüvvədən düşmüşdür.

1. Mülkiyyət formasından, tabeçiliyindən və qeydiyyata alındığı yerdən asılı olmayaraq bütün hüquqi şəxslər, hüquqi şəxs yaratmadan sahibkarlıq fəaliyyəti ilə məşğul olan şəxslərdən Azərbaycan Respublikası ərazisinə gətirilən və Azərbaycan Respublikası ərazisindən çıxarılan mallara, əmlaklara (nağd xarici valyuta istisna olmaqla) gömrük əməliyyatı aparılması üçün aşağıda göstərilən qayda və miqdarlarda ödənclər alınması müəyyən edilsin:

1.1. Dövlət müəssisələri tərəfindən barter və qapalı valyuta (manatla) sövdələşmələrinə uyğun olaraq gətirilən və ya aparılan mallardan bu malların gömrük dəyərinin 0,15% -i (minimum əmək haqqının 3 mislindən az olmayaraq) manatla ödənc ödənilir.

Sövdələşmə sərbəst dönərli valyuta ilə aparıldıqda bu malların gömrük dəyərinin 0,15% -i miqdarında Azərbaycan Respublikası Milli Bankının manatın müvafiq xarici valyutaya müəyyən etdiyi məzənnəyə uyğun olaraq ödənc ödənilir.

1.2. Azərbaycan Respublikası ərazisinə dövlət müəssisələri tərəfindən gətirilən və ya aparılan əmlaklara bu əmlakın gömrük dəyərinin 0,15% -i miqdarında (minimum əmək haqqının 3 mislindən az olmayaraq) manatla ödənc alınır.

1.3. Dövlət müəssisəsinin bir Gömrük Yük Bəyannaməsi vasitəsilə müvəqqəti olaraq Azərbaycan Respublikası ərazisindən aparılan və ya gətirilən əmlaklarından gömrük əməliyyatları üçün minimum əmək haqqının 3 misli miqdarında ödənc alınır.

Bu Təlimat 1.1, 1.2, 1.3 bəndlərində göstərilən şərtlərə uyğun olaraq Azərbaycan Respublikası ərazisinə gətirilən və ya aparılan malların və əmlakın gömrük dəyəri « Gömrük Yük Bəyənnaməsinin» doldurulması haqqında təlimata uyğun olaraq müəyyən edilir.

2. İstehsal kooperativlərinin, onların birliklərinin, müştərək müəssisələrinin, beynəlxalq birlik və təşkilatların, ictimai təşkilatların, xarici şirkətlərin malları və ya əmlakı Azərbaycan Respublikası ərazisinə gətirilərkən və aparılarkən gömrük əməliyyatları üçün aşağıdakı 2.1, 2.2, 2.3 bəndlərində göstərilən miqdarlarda ödənc alınır.

2.1. Azərbaycan Respublikası ərazisinə nizamnamə fondu hesabına əmlak və mal gətiriləndə gömrük əməliyyatları üçün gömrük dəyərinin 0,25%-i miqdarında Azərbaycan Respublikası Milli Bankının müəyyən etdiyi məzənnəyə görə manatla (minimum əmək haqqının 2 mislindən az olmayaraq) ödənc alınır.

2.2. Azərbaycan Respublikası ərazisinə mal gətirilərkən və ya buradan mal aparılarkən (barter sövdələşməsi, qapalı valyuta ilə sövdələşmələr) gətirilən və ya aparılan malların gömrük dəyərinin 0,25%-i miqdarında (minimum əmək haqqının 4 mislindən az olmayaraq) gömrük əməliyyatları üçün haqq alınır.

2.3. Azərbaycan Respublikası ərazisinə mal gətirilərkən və ya buradan mal aparılarkən (sərbəst dönərli valyuta ilə sövdələşmə) gömrük dəyərinin 0,15%-i miqdarında Azərbaycan Respublikası Milli Bankının müəyyən etdiyi məzənnəyə görə (5 ABŞ dollarından az olmayaraq) manatla gömrük əməliyyatları üçün ödənc alınır.

2.4. Azərbaycan Respublikası ərazisinə gətirilən və ya buradan aparılan mal və əmlakdan, sövdələşmə « birbaşa istehsal əlaqələri üzrə mal göndərilməsi» üsulu ilə aparıldığı təqdirdə gömrük dəyərinin 0,25%-i miqdarında (minimum əmək haqqının 4 mislindən az olmayaraq), həmçinin emal üçün xammal və yarımfabrikatlar (sifarişçinin öz xammalından) göndərildikdə və bu xammal və yarımfabrikatlar emal olunduqdan sonra göndərildikdə gömrük dəyərinin 0,25%-i miqdarında (minimum əmək haqqının 4 mislindən az olmayaraq) gömrük əməliyyatları üçün ödənc alınır.

2.5. Konsiqnasiya mahiyyətli sövdələşmələr (konsiqnasiya, komisyon əsasında mal təslim etmək) aparılarkən gömrük dəyərinin 0,25%-i miqdarında (minimum əmək haqqının 3 mislindən az olmayaraq) və MDB ölkələri də daxil olmaqla göndərildiyi ölkədən asılı olmayaraq, ödəmə günündə Azərbaycan Respublikası Milli Bankının müəyyən etdiyi məzənnəyə görə manatla gömrük əməliyyatları üçün ödənc alınır.

2.6. Azərbaycan Respublikası ərazisinə humanitar yardım məqsədi ilə gətirilən və ya aparılan mallara, avadanlıqlara gömrük əməliyyatları üçün ödənc alınır.

2.7. Gömrük Yük Bəyannaməsinin hər bir əlavə vərəq üçün minimum əmək haqqının 2 misli miqdarında manatla, sövdələşmə sərbəst dönərli valyuta ilə aparıldıqda isə 5 ABŞ dolları miqdarında Azərbaycan Respublikası Milli Bankının müəyyən etdiyi məzənnəyə görə manatla ödənc alınır. Sövdələşmələr manat hesabı, qapalı valyuta hesabı (21, 31, 27 və s.), sifarişçinin öz xammalı, birbaşa istehsal əlaqələri əsasında aparıldıqda, bir əlavə vərəq üçün minimum əmək haqqının 2 misli miqdarında ödənc alınır.

3. Tranzit yük bəyannamələri üçün hər bəyannaməyə görə 10 ABŞ dolları və hər əlavə vərəq üçün 5 ABŞ dolları miqdarında ödənc alınır.

Azərbaycan Respublikası Nazirlər Kabinetinin
1997-ci il 16 iyun tarixli 62 nömrəli qərarı ilə
təsdiq edilmişdir.
Əlavə № 2

*) Gömrük xidməti üzrə ödənclər gömrük tələbnaməsinin verildiyi günə ABŞ dollarının Azərbaycan Respublikası Milli Bankının müəyyən etdiyi məzənnə ilə manatla ödənilir.

Azərbaycan Respublikası Nazirlər Kabinetinin
1997-ci il 16 iyun tarixli 62 nömrəli qərarına
Əlavə № 3