Gömrük anbarları haqqında nümunəvi Əsasnamənin təsdiq edilməsi barədə Qərar № 400

Azərbaycan Respublikası Nazirlər Kabineti

Gömrük anbarları haqqında nümunəvi Əsasnamənin təsdiq edilməsi barədə

Qərar № 400

Bakı şəhəri, 16 noyabr 1994-cü il

Azərbaycan Respublikası Nazirlər Kabineti qərara alır:

Azərbaycan Respublikası Ədliyyə, Maliyyə, Ticarət nazirliklərinin, Dövlət Gömrük Komitəsinin və Baş Dövlət Vergi Müfəttişliyinin təqdim etdikləri Gömrük anbarları haqqında nümunəvi Əsasnamə təsdiq edilsin.

Baş nazirin vəzifəsini icra edən

F. QULİYEV.

5 fevral 1998-ci il tarixli 21 saylı qərara əsasən qüvvədən düşmüşdür («AzerSoft»).

Azərbaycan Respublikası Nazirlər Kabinetinin
1994-cü il 16 noyabr tarixli 400 nömrəli qərarı ilə
təsdiq edilmişdir.

Gömrük anbarları haqqında nümunəvi Əsasnamə

1. Ümumi müddəalar

Azərbaycan Respublikasına hava, su, quru və dəmir yolu ilə göndərilən, Azərbaycan Respublikası ərazisindən keçirilən və ya xarici ölkələrə ixrac edilən (göndərilən) malların saxlandığı yerlər anbar adlanır. Gömrük anbarları ŞUgömrük orqanları, habelə idarə, müəssisə, təşkilatlar və eləcə də Azərbaycan Respublikası vətəndaşları tərəfindən Dövlət Gömrük Komitəsindən lisenziya alındıqdan sonra yaradılır, Azərbaycan Respublikası Ədliyyə Nazirliyində qeydiyyatdan keçir.

Azərbaycan Respublikasının gömrük sərhəddindən keçirilən mallar və digər əşyalar gömrük rəsmiləşdirilməsinə qədər gömrük orqanlarının razılığı və nəzarəti altında Gömrük anbarlarında saxlanıla bilər.

Aşağıdakı hallarda mallar və digər əşyalar mütləq Gömrük anbarlarında saxlanılmağa verilməlidir:

gətirilən mallar və əşyalar müəyyən edilmiş qadağan və məhdudiyyətlərlə əlaqədar olaraq Azərbaycan Respublikasının Gömrük ərazisinə buraxılmadıqda və ya Azərbaycan Respublikası ərazisində tranzit olub və gətirilən günü Azərbaycan Respublikası ərazisindən çıxarılmadıqda;
Azərbaycan Respublikası Gömrük ərazisinə gətirilən mallara qoyulmuş gömrük rüsumları, vergiləri (vaxtı uzadılmış və ya möhlət verilmişləri çıxmaq şərtilə) ödənilmədikdə;
Azərbaycan Respublikası Gömrük ərazisinə müvəqqəti saxlanılmaq üçün gətirilən və saxlanılma müddəti qurtardığına görə gömrük sərhəddindən çıxarılan mallar və digər əşyalar. Azərbaycana gətirilməsi və Azərbaycandan aparılması qanunla qadağan olunan mallar anbarlara qəbul edilmir.

Gömrük anbarları hüquqi şəxs olmaqla, müstəqil fəaliyyət göstərir. Öz fəaliyyətini tam təsərrüfat hesablı və özünü maliyyələşdirmə prinsipi əsasında həyata keçirilməklə, Azərbaycan Respublikasına gətirilən, Azərbaycan Respublikasından keçirilən və ya xarici ölkələrə göndərilən malların tam saxlanılması və mühafizə edilməsi xidmətlərini göstərir.

Gömrük anbarları öz fəaliyyətində qanunvericilik aktlarına Azərbaycan Respublikası Prezidentinin fərman və sərəncamlarına, Azərbaycan Respublikası Nazirlər Kabinetinin qərar və sərəncamlarına və həmçinin bu Əsasnaməyə əsaslanır.

Azərbaycan Respublikası banklarında hesablaşma və digər hesabı və habelə üzərində adı yazılmış dairəvi möhürü vardır.

Gömrük anbarları lisenziya alındıqdan sonra fəaliyyətə başlaya bilər. Gömrük anbarlarına lisenziyanın verilməsi Azərbaycan Respublikasının qanunvericiliyində nəzərdə tutulduğu qaydada həll edilir.

2. Anbar rejimi

Anbarlara qəbul edilən mallar, daxil olduğu andan gömrük nəzarətində olur.

Gömrük anbarının gömrük rejimi mühafizə dövrü üçün gömrük rüsumları, vergiləri alınmadan və iqtisadi siyasət tədbirləri tətbiq edilmədən gətirilən malların gömrük nəzarəti altında mühafizəsi, həmçinin ixrac üçün nəzərdə tutulmuş malların faktiki ixracı zamanı qaytarılmalı və azad edilməli olan gömrük rüsumları və vergilər qaytarılmaqla və onlardan azad edilməklə gömrük nəzarəti altında mühafizəsi üçün müəyyən edilir.

3. Gömrük anbarları

Gömrük anbarı rejiminə uyğun şəkildə malların saxlanılması üçün xüsusi olaraq ayrılmış və təchiz edilmiş hər hansı bir bina və başqa yer gömrük anbarı sayılır.

Gömrük anbarı hər hansı bir şəxsin istifadə edə biləcəyi açıq tipli və yaxud da yalnız müəyyən şəxslərin mallarının saxlanması üçün qapalı tipli ola bilər.

Qapalı tipli gömrük anbarları yalnız açıq tipli anbar təşkil etmək məqsədəuyğun olmaması üçün kifayət qədər əsas olduğu təqdirdə tə`sis edilə bilər.

Bu anbarl arda həmçinin lazım olduqda, gömrük rüsumları və vergiləri alınması məqsədilə yoxlanılan mallar da yerləşdirilə bilər.

4. Gömrük anbarlarında olan malların qeydiyyatı

Gömrük anbarlarının sahibləri gətirilən, saxlanılan və aparılan malların qeydiyyatını aparır. Anbarlarda olan bütün dəyişikliklər qeydiyyat sənədlərində öz əksini tapmalıdır.

5. Gömrük anbarları və onların sahibləri üçün qoyulan tələblər

Azərbaycan Respublikasının Gömrük orqanları, Azərbaycan Respublikasının vətəndaşları və hüquqi şəxslər Gömrük anbarı sahibi ola bilərlər.

Azərbaycan Respublikasının gömrük orqanları Gömrük anbarı sahiblərindən gömrük anbarı üçün ayrılan binaların və ya başqa yerlərin gömrük nəzarətini lazımi qaydada tə`min edəcək vəziyyətdə olmasını, onların bağlayıcı qurğularla təchiz edilməsi və həmin qurğulardan birinin gömrük orqanının öhdəsinə verilməsini tələb edə bilər.

Gömrük anbarı sahibinin vəzifələri:

Gömrük anbarı saxlanılan malların gömrük nəzarətindən kənar götürülməsinə imkan verməməlidir;
Gömrük nəzarətinin həyata keçirilməsini çətinləşdirməməlidir;
Gömrük anbarı tə`sis edilməsi üçün verilmiş lisenziyanın şərtlərinə əməl etməli, Azərbaycan Respublikası gömrük orqanlarının vəzifəli şəxslərinin mallar olan yerə daxil olmasına imkan yaratmalı, gömrük nəzarəti və gömrük rəsmiləşdirilməsinin həyata keçirilməsi üçün həmin şəxslərə pulsuz olaraq gömrük anbarlarında yer, avadanlıq və rabitə vasitələri verməlidir;
anbarda saxlanılan malların qeydiyyatını aparmalı və Azərbaycan Respublikası Dövlət Gömrük Komitəsinin müəyyən etdiyi qaydada Azərbaycan Respublikası gömrük orqanlarına anbarlarda saxlanılan mallar barədə hesabat verməlidir.

6. Malların anbarda saxlanma müddətləri

Gömrük anbarlarında mallar altı ay müddətində saxlanıla bilər. Azərbaycan Respublikası Dövlət Gömrük Komitəsi ayrı-ayrı malların Gömrük anbarlarında saxlanılması müddətini məhdudlaşdıra bilər.

7. Gömrük rüsumları vergilərinin tutulması və iqtisadi-siyasət tədbirlərinin tətbiq edilməsi

Gömrük anbarlarına xarici ölkələrdən mal gətirilərkən, həmçinin həmin anbarlara Azərbaycan Respublikasının malları gətirilərkən bu mallardan gömrük vergiləri və rüsumları alınmır, iqtisadi-siyasət tədbirləri tətbiq edilmir.

Marağı olan şəxsin xahişi ilə, Azərbaycan Respublikası gömrük orqanları tərəfindən malın mənşəyi sertifikatla təsdiq edilir.

Mənşə haqqında sertifikat olmadıqda, ixrac zamanı gömrük rüsumları, vergiləri alınması və iqtisadi-siyasət tədbirləri görülməsi məqsədi ilə mallar Azərbaycan Respublikasının malları hesab edilir.

8. Gömrük rüsumları və vergilərinin geri qaytarılması və onlardan azad edilməsi

İxrac ediləcək mallar gömrük anbarlarına qoyulduqda gömrük rüsumları və vergiləri qaytarılır v ya bunları ödəməkdən azad edilir. Mallar gömrük rüsumları və vergilərin qaytarıldığı və ya bunları ödəməkdən azad edildiyi andan e`tibarən 3 aydan gec olmayaraq ixrac edilməlidir.

İxrac ediləcək mallar Azərbaycan Respublikasının gömrük ərazisinin digər hissəsinə qaytarıldıqda və ya müəyyən edilən müddətdə ixrac edilmədikdə gömrük rüsumları və vergiləri, həmçinin Azərbaycan Respublikası Milli Bankı tərəfindən verilən kreditlər üçün nəzərdə tutulan tariflərlə əlavə faizlər ödənilir.

9. Malların mühafizəsi zamanı həyata keçirilən tədbirlər

Gömrük anbarlarında malların mühafizə edilib saxlanılması zamanı aşağıdakı tədbirlər həyata keçirilə bilər:

malların salamat saxlanılması və mühafizəsinin tə`min edilməsi üzrə tədbirlər;
Azərbaycan Respublikası gömrük orqanının icazəsi ilə malların satış və daşınma üçün hazırlanması, yə`ni malların partiyalara, hissələrə ayrılması, komplektləşdirilməsi, çeşidlənməsi, qablaşdırılması, yenidən markalanması, göndərişlərin təşkil edilməsi, yüklənməsi və s. əməliyyatların yerinə yetirilməsi;
əməliyyatların siyahısını və aparılması qaydalarını Azərbaycan Respublikası Dövlət Gömrük Komitəsi müəyyən edir.

10. Gömrük ödənişlərinin ödənilməsi üçün məs`uliyyət

Gömrük rüsumları, vergiləri və digər gömrük ödənişlərinin ödənilməsi üçün gömrük anbarlarının sahibi məs`uliyyət daşıyır.

11. Gömrük anbarının fəaliyyətinin ləğv edilməsi

Gömrük anbarının fəaliyyətinin ləğv edilməsi Azərbaycan Respublikası qanunvericiliyində nəzərdə tutulan hallarda və qaydada həyata keçirilir.