Gömrük rəsmiləşdirilməsinə görə gömrük yığımlarının alınması qaydaları barədə Əmr № 73

Azərbaycan Respublikası Dövlət Gömrük Komitəsi

Gömrük rəsmiləşdirilməsinə görə gömrük yığımlarının alınması qaydaları barədə

Əmr № 73

10 dekabr 1999-cu il

Azərbaycan Respublikasının gömrük sərhədindən keçirilən malların gömrük rəsmiləşdirilməsinə görə alınan gömrük yığımlarının hesablanması və ödənilməsində, habelə bu ödənişlərdən güzəştlər verilməsində vahid qayda yaradılmasını təmin etmək məqsədi ilə Azərbaycan Respublikası Gömrük Məcəlləsinin 112-ci maddəsinə əsasən əmr edirəm:

1. «Gömrük rəsmiləşdirilməsinə görə gömrük yığımlarının alınması Qaydaları» təsdiq edilsin (əlavə olunur).

2. Tabelikdə olan gömrük orqanlarının rəhbərlərinə tapşırılsın ki, respublikanın gömrük sərhədindən keçirilən malların gömrük rəsmiləşdirilməsi zamanı bu qaydalara əməl olunmasını təmin etsinlər.

3. İşlər İdarəsinə (R.Zalov) tapşırılsın ki, əmrin surətinin gömrük orqanlarına çatdırılmasını təmin etsin.

4. Əmrin icrasına nəzarət Maliyyə-Tarif və Valyuta Nəzarəti Baş İdarəsinə (M.Vahabov) tapşırılsın.

Komitənin sədri

K.F.HEYDƏROV.

Gömrük rəsmiləşdirilməsinə görə gömrük yığımlarının alınması
QAYDALARI

I. Ümumi müddəalar

1.1. «Gömrük rəsmiləşdirilməsinə görə gömrük yığımlarının alınması Qaydaları» (bundan sonra — Qaydalar) Azərbaycan Respublikası Gömrük Məcəlləsinin 112-ci maddəsinə müvafiq olaraq mal qismində Azərbaycan Respublikası gömrük sərhədindən keçirilən nəqliyyat vasitələri də daxil olmaqla malların, o cümlədən müşayiət olunmayan baqajda, beynəlxalq poçt göndərişlərində keçirilən kommersiya məqsədləri üçün nəzərdə tutulmayan malların və yüklərin, həmçinin nəqliyyat vasitələrinin (bundan sonra — malların) gömrük rəsmiləşdirilməsinə görə gömrük yığımlarının alınması qaydalarını müəyyən edir.

1.2. Qaydaların 1.1 yarımbəndi ilə müəyyən edilmiş malların gömrük rəsmiləşdirilməsi Azərbaycan Respublikasının Gömrük Məcəlləsinə uyğun olaraq aparılır və bu mallardan gömrük rəsmiləşdirilməsinə görə gömrük yığımları alınması hüquqi şəxslərə və hüquqi şəxs yaratmadan sahibkarlıq fəaliyyəti ilə məşğul olan fiziki şəxslərə şamil edilir.

1.3. Fiziki şəxslər tərəfindən gömrük sərhədindən keçirilən istehsalat və ya kommersiya fəaliyyəti üçün nəzərdə tutulmayan, yəni mövcud gömrük qanunvericiliyinə uyğun olaraq müəyyən edilmiş miqdar və dövr məhdudiyyətləri daxilində rüsumsuz gətirilməsinə icazə verilən mallardan (beynəlxalq poçt göndərişləri də daxil olmaqla) gömrük rəsmiləşdirilməsinə görə gömrük yığımları alınmır.

1.4. Gömrük rəsmiləşdirilməsinə görə gömrük yığımlarının ödənilməsi üçün möhlət verilmir və ya vaxtı uzadılmır. Gömrük orqanları tərəfindən heç bir əməliyyat aparılmaması halları istisna olmaqla, gömrük rəsmiləşdirilməsinə görə əvvəlcədən ödənilmiş gömrük yığımları geri qaytarılmır.

1.5. Gömrük rejimləri dəyişdirildikdə yeni rejim üçün müəyyən edilmiş miqdarda gömrük rəsmiləşdirilməsinə görə gömrük yığımları alınır.

2. Gömrük rəsmiləşdirilməsinə görə alınan gömrük yığımlarının miqdarı, hesablanması və ödənilməsi

2.1. Gömrük rəsmiləşdirilməsinə görə alınan gömrük yığımlarının miqdarı mövcud qanunvericiliyə uyğun olaraq müəyyən edilir.

Dövlət Gömrük Komitəsi müəyyən edilmiş gömrük yığımlarının miqdarına zərurət yarandıqda yenidən baxılması təklifi ilə çıxış edə bilər.

2.2. Gömrük rəsmiləşdirilməsinə görə gömrük yığımları qanunvericilikdə nəzərdə tutulmuş müəyyən hallar istisna olmaqla manatla ödənilir.

Gömrük rəsmiləşdirilməsinə görə gömrük yığımları ABŞ dolları ilə müəyyən edildikdə YGB-si qəbul edilən günə Azərbaycan Respublikası Milli Bankının müəyyən etdiyi məzənnəyə görə manatla alınır.

2.3. Sərbəst dövriyyə üçün buraxılış, təkrar idxal, rüsumsuz ticarət mağazası, gömrük ərazisində emal, gömrük nəzarəti altında emal, müvəqqəti idxal (ixrac), gömrük ərazisindən kənarda emal, ixrac, təkrar ixrac, məhvetmə gömrük rejimləri altında yerləşdirilmiş, habelə, fiziki şəxslər tərəfindən Azərbaycan Respublikasının gömrük sərhədindən mövcud gömrük qanunvericiliyinə uyğun olaraq sadələşdirilmiş və güzəştli qaydada rəsmiləşdirilməklə müəyyən edilmiş miqdar və dəyər məhdudiyyətləri həcmində keçirilən, vahid dərəcə ilə gömrük rüsumlarına cəlb edilən malların (bu Qaydalarda və qanunvericilikdə nəzərdə tutulan hallar istisna olunmaqla) gömrük rəsmiləşdirilməsinə görə gömrük yığımları rəsmiləşdirilən malın gömrük dəyərinin 0,15%-i həcmində (10 ABŞ dollarına ekvivalent məbləğdən az olmayaraq) alınır.

2.4. Malların və nəqliyyat vasitələrinin gömrük rəsmiləşdirilməsini aparan gömrük orqanının müəyyən etdiyi iş vaxtından kənar vaxtda və ya müəyyən etdiyi yerdən kənarda gömrük rəsmiləşdirilməsinə görə gömrük yığımları ikiqat miqdarda alınır.

2.5. Gömrük rəsmiləşdirilməsinə görə gömrük yığımları məbləği gömrük rüsumları və vergiləri üçün müəyyən edilən vergitutma obyektində nəzərə alınmır.

2.6. Müvəqqəti idxal (ixrac) gömrük rejimi altında yerləşdirilmiş mallardan gömrük rəsmiləşdirilməsinə görə gömrük yığımları mallar həmin gömrük rejimi altında yerləşdirildikdə, habelə göstərilən gömrük rejiminin fəaliyyəti başa çatdıqda alınır.

2.7. Beynəlxalq müqavilələrdə və mövcud qanunvericilikdə nəzərdə tutulmuş hallar istisna olmaqla Azərbaycan Respublikasının gömrük sərhədindən tranzit gömrük rejimi altında keçirilən malların gömrük rəsmiləşdirilməsinə görə 30 ABŞ dolları həcmində gömrük yığımları alınır.

2.8. Azərbaycan Respublikası qanunvericiliyinə uyğun olaraq hüquqi şəxslər tərəfindən respublikaya gətirilən xarici valyutanın nominal dəyərinin 0,15 faizi həcmində gömrük rəsmiləşdirilməsinə görə yığım alınır.

2.9. Gömrük rəsmiləşdirilməsinə görə gömrük yığımları gömrük bəyannaməsi qəbul edilənə qədər və ya gömrük bəyənnaməsinin qəbul edilməsi ilə eyni vaxtda ödənilir.

2.10. Gömrük rəsmiləşdirilməsinə görə gömrük yığımları Azərbaycan Respublikasının Gömrük Məcəlləsi ilə müəyyən edilmiş qaydada gömrük orqanlarının büdcədənkənar inkişaf fonduna köçürülür.

3. Gömrük rəsmiləşdirilməsinə görə alınan gömrük yığımlarından güzəştlər

3.1. Aşağıdakı hallarda malların gömrük rəsmiləşdirilməsinə görə gömrük yığımları alınmır:

humanitar və texniki yardım (qrant) yüklərinin rəsmiləşdirilməsi zamanı;

mallar dövlətin xeyrinə imtina rejimi altında yerləşdirildikdə;

elektrik enerjisinin qarşılıqlı ötürülməsinin gömrük rəsmiləşdirilməsi zamanı;

Azərbaycan Respublikasının ərazisində yerləşən diplomatik nümayəndəliklərin rəsmi istifadəsi üçün keçirilən malların gömrük rəsmiləşdirilməsi zamanı;

Azərbaycan Respublikasının xarici dövlətlərin ərazisində yaradılan diplomatik və ona bərabər tutulan nümayəndəliklərinin fəaliyyət göstərməsi üçün respublikanın gömrük ərazisindən çıxarılan malların gömrük rəsmiləşdirilməsi zamanı;

Azərbaycan Respublikası Milli Bankı tərəfindən gətirilən və ya aparılan Azərbaycan Respublikasının milli valyutasının gömrük rəsmiləşdirilməsi zamanı;

mövcud qanunvericiliyə uyğun olaraq kommersiya bankları tərəfindən gömrük ərazisindən çıxarılan xarici valyutanın (köhnəlmiş əskinazların) gömrük rəsmiləşdirilməsi zamanı;

gömrük rüsumları və vergiləri alınmayan, iqtisadi siyasət tədbirləri tətbiq edilməyən gömrük dəyəri 100 ABŞ dollarına ekvivalent malların gömrük rəsmiləşdirilməsi zamanı;

gömrük dəyəri 10 ABŞ dollarına ekvivalent məbləğdən aşağı olan beynəlxalq poçt göndərişlərinin gömrük rəsmiləşdirilməsi zamanı;

beynəlxalq və dövlətlərarası daşımalarda istifadə olunan Azərbaycan hava, su və dəmir yoluna məxsus zədələnmiş nəqliyyat vasitələrinin mal-nəqliyyat sənədləri əsasında rəsmiləşdirilməsi zamanı;

xarici ölkələrdən tranzitlə keçirilən Azərbaycan mallarından;

beynəlxalq Yük Daşıma Kitabçası tətbiq edilməklə tranzitlə keçirilən mallardan;

Azərbaycan Respublikasının beynəlxalq müqavilələri və Sazişləri ilə müəyyən edilmiş hallarda gömrük sərhədindən keçirilən mallardan (bu barədə Dövlət Gömrük Komitəsi tərəfindən gömrük orqanlarına əlavə məlumat verilir).