23 mart 1998-ci il

Respublika Nazirlər Kabinetinin 25 dekabr 1997-ci il tarixli, 140 nömrəli «Azərbaycan Respublikasının gömrük sisteminin büdcədənkənar inkişaf fondu haqqında Əsasnamə və fondun vəsaitinin xərclənməsi Qaydaları barədə» qərarından irəli gələn tələbləri həyata keçirmək, habelə gömrük vergi və rüsumların düzgün hesablanıb vaxtında dövlət büdcəsinə köçürmək, xarici-iqtisadi əlaqələr fəaliyyəti nəticəsində əldə olunmuş valyuta sərvətləri şəklində gəlirlərin gizlədilməsi hallarının qarşısını almaq, habelə digər gömrük qaydalarının pozulmasına qarşı mübarizədə gömrük orqanları əməkdaşlarının marağını artırmaq məqsədi ilə əmr edirəm:

1. Gömrük Məcəlləsinin 398-ci maddəsinə uyğun olaraq hazırlanmış və əlaqədar təşkilatlarla razılaşdırılmış «Azərbaycan Respublikası gömrük orqanları əməkdaşlarının fərdi qaydada mükafatlandırılması haqqında» Əsasnamə təsdiq edilsin (əlavə olunur).

2. Naxçıvan MR Gömrük Komitəsinə, Bakı Baş Gömrük İdarəsinə, Bina Gömrük İdarəsinə və bütün gömrükxanalara tapşırılsın ki, Əsasnamənin tələblərinə ciddi riayət etməklə onun müddəalarının yerinə yetirilməsini təmin etsinlər.

3. Əsasnamənin icrasından irəli gələn məsələlərin həlli Maliyyə-Tarif və Valyuta nəzarəti Baş İdarəsinə (F.Məmmədov), Gömrük Nəzarətinin Təşkili Baş İdarəsinə (A.Əliyev), Qaçaqmalçılıq və gömrük qaydalarının pozulmasına qarşı mübarizə Baş idarəsinə (S.Məmmədov) və Hüquq şöbəsinə (S.Muxtarov) tapşırılsın.

4. İşlər İdarəsi (R.Həsənəliyev) Əsasnamənin Komitənin müvafiq strukturlarına və bütün gömrük orqanlarına çatdırılmasını təmin etsin.

Komitənin sədri

K.HEYDƏROV.

1. Azərbaycan Respublikası gömrük orqanları əməkdaşlarının fərdi qaydada mükafatlandırılması (bundan sonra — mükafatlandırma) Azərbaycan Respublikası Gömrük Məcəlləsinin 398-ci maddəsinə və Azərbaycan Respublikası Nazirlər Kabinetinin 25 dekabr 1997-ci il tarixli 140 №-li «Azərbaycan Respublikasının gömrük sisteminin büdcədənkənar inkişaf fondu haqqında Əsasnamə və fondun vəsaitinin xərclənməsi Qaydaları barədə» qərarına əsasən həyata keçirilir.

Mükafatlandırılmanın tətbiqindən məqsəd gömrük orqanlarının əməkdaşlarının gömrük qanunvericiliyinin tələblərinə riayət etməsi üzərində nəzarətin gücləndirilməsinə, malın gömrük dəyərinin düzgün müəyyən edilməsinə, büdcəyə çatacaq vəsaitlərin vaxtında və tam köçürülməsinə nail olmaqdan ibarətdir.

2. Fərdi qaydada mükafatlandırma gömrük orqanının yoxlamanı aparmış və gömrük qaydalarının pozulması hallarını aşkar etmiş əməkdaşlarına şamil olunur.

3. Gömrük orqanları əməkdaşlarının fərdi qaydada mükafatlandırılması gömrük işi sahəsində cinayətlər və gömrük qaydalarının pozulması işləri üzrə müəyyən edilmiş qaydada Azərbaycan Respublikasının dövlət mülkiyyətinə keçirilmiş malların, nəqliyyat vasitələrinin və digər əşyaların satışından əldə edilən vəsaitlərin, gömrük orqanlarının normal fəaliyyətinə qəsd edən inzibati hüquqpozmalara və gömrük qaydalarının pozulmasına görə müsadirə edilmiş malların və nəqliyyat vasitələrinin satışından və yaxud onarın dəyərinin tutulmasından əldə edilən vəsait, cərimələr və yığımlar, gömrük qaydalarının pozulması və ya gömrük orqanlarının normal fəaliyyətinə qəsd edən hüquqpozmalar nəticəsində müsadirə olunan valyuta məbləğləri və yoxlama ilə əlaqədar maliyyə sanksiyası nəticəsində alınmış məbləğlər hesabına həyata keçirilir.

4. Fərdi qaydada mükafatlandırma yuxarıda qeyd olunan yığımların fonda daxil olmuş məbləğlərindən bu Əsasnaməyə Əlavədə göstərilən miqdarda hesablanır. Hər bir hüquqi və fiziki şəxs üzrə mükafatlandırma ayrılıqda rəsmiləşdirilir.

5. İki və daha çox işçinin iştirakı ilə eyni bir məsələyə dair aparılmış yoxlamanın nəticəsində və yaxud gömrük qaydalarının pozulmasına görə tətbiq edilmiş və fonda daxil olmuş maliyyə sanksiyası və inzibati tənbeh nəticəsində alınmış məbləğlərə görə hesablanmış fərdi mükafatlandırmanın məbləği, həmin işçilər arasında bərabər surətdə bölünür.

Yoxlama iki və daha çox işçilər tərəfindən müxtəlif məsələlərə dair aparıldıqda hər bir işçiyə düşən fərdi mükafatın məbləği onların yoxladıqları məsələlər üzrə tətbiq edilmiş və fonda daxil olmuş maliyyə sanksiyası və inzibati tənbeh nəticəsində alınmış məbləğlərdən asılı olaraq ayrılıqda müəyyən edilir.

6. Fərdi qaydada mükafatlandırmanın tətbiqi ilə əlaqədar olaraq gömrük orqanının yoxlamanı aparmış və bu yoxlama aktına rəy vermiş əməkdaşlar, habelə həmin işçilər tərəfindən yoxlamaların aparılmasına nəzarət etməsi həvalə olunmuş vəzifəli şəxsləri yoxlamanın düzgün aparılmasına, maliyyə sanksiyalarının və inzibati cərimələrin düzgün tətbiq olunmasına görə məsuliyyət daşıyırlar.

Gömrük orqanları əməkdaşları tərəfindən düzgün olmayaraq fərdi qaydada mükafat alınması aşkar edildiyi hallarda, ödənilmiş mükafat məbləği müəyyən edilmiş qaydada onlardan tutulur, eyni zamanda onun ödənilməsində təqsirkar olan işçilər barədə qanunvericilikdə nəzərdə tutulmuş tədbirlər görülür.

7. Fərdi mükafatın məbləği işçinin aylıq vəzifə maaşının on mislindən yuxarı olduqda həmin mükafatlar Azərbaycan Respublikası Dövlət Gömrük Komitəsinin icazəsi ilə ödənilir. Bu halda fərdi mükafatlandırma üçün əsas olan sənədlər, həmçinin yoxlama aktına verilmiş və gömrük orqanının rəhbəri tərəfindən təsdiq edilmiş rəy Azərbaycan Respublikası Dövlət Gömrük Komitəsinin rəhbərliyinə təqdim olunmalıdır.

Fərdi mükafatlandırma ilə əlaqədar yoxlamanın materiallarına Azərbaycan Respublikası Dövlət Gömrük Komitəsinin müvafiq idarə və şöbələri tərəfindən Azərbaycan Respublikası Gömrük Məcəlləsinə və digər qanunverici aktlarına müvafiq olaraq baxılır.

Yoxlamaların materiallarına, onların daxil olduğu vaxtından 15 gün müddətindən gec olmayaraq baxılır, mükafatın verilməsi üçün rəy tərtib edilərək kuratorluqdan asılı olaraq Azərbaycan Respublikası Dövlət Gömrük Komitəsinin sədr müavinlərindən biri tərəfindən təsdiq olunur.

8. Gömrük orqanları tərəfindən əməkdaşların fərdi qaydada mükafatların ödənilməsi, yalnız onlar tərəfindən tətbiq edilmiş maliyyə sanksiyası və inzibati tənbehlə əlaqədar alınmış məbləğlər fonda tam daxil olduqdan sonra həyata keçirilir.

İşçilərə fərdi mükafatın ödənilməsi, onlar tərəfindən aparılmış yoxlamadan və yaxud gömrük qaydalarının pozulmasına görə tətbiq edilmiş maliyyə sanksiyası və inzibati tənbehlə əlaqədar olaraq alınmış məbləğlərinin fonda daxil olduğu vaxtdan ən geci 15 gün ərzində, mükafatın ödənilməsi Azərbaycan Respublikası Dövlət Gömrük Komitəsinin icazəsi ilə aparıldığı hallarda isə, həmin icazənin müvafiq gömrük orqanlarına daxil olduğu vaxtdan ən geci 5 gün ərzində həyata keçirilir.

«Azərbaycan Respublikası
gömrük orqanları əməkdaşlarının
fərdi qaydada mükafatlandırılması haqqında»
Əsasnaməyə
Əlavə