1. Mülkiyyət formasından asılı olmayaraq, müəssisələr, birliklər və təşkilatlar (sonralar müəssisələr) Azərbaycan Respublikası Prezidentinin 1994-cü il 25 aprel tarixli 77 saylı Sərəncamı ilə təsdiq olunmuş normativlərə əsasən (əlavə olunur) malların (işlərin, xidmətlərin) ixracından və digər xidmətlərdən, fəaliyyətlərdən alınan valyuta gəlirlərindən ayırmaların respublika Vahid Valyuta Fonduna köçürülməsini təmin etsinlər.

2. Azərbaycan Respublikası müəssisələrinin istehsalat tələbatının ödənilməsi üçün MDB və Baltikyanı ölkələrdə yerləşən müəssisələrdən ehtiyat hissələri, xammal və məmulatlar alınması zəruriliyini nəzərə alaraq, müəssisələrin MDB və Baltikyanı ölkələrə malların (işlərin, xidmətlərin) ixracından həmin ölkələrin milli valyutalarında aldıqları valyuta gəlirlərindən respublika Vahid Valyuta Fonduna köçürüləcək ayırmalar Azərbaycan Respublikası Prezidentinin 1994-cü il tarixli 77 saylı sərəncamı ilə təsdiq olunmuş müvafiq mallar (iş, xidmətlər) üzrə valyuta ayırmaları normativlərinin 50 faizi həcmində müəyyən edilsin.

3. Müəyyən edilsin ki:

a) müəssisələrin əməliyyatlar aparmaq metodlarından (müstəqil və ya vasitəçiliklə) və sövdələrin xarakterindən asılı olmayaraq Azərbaycan Respublikasının ərazisində və xaricdə malların (işlərin, xidmətlərin) satış və ixracından həmin əməliyyatlar üzrə xarici valyutada çəkilən xərclər çıxılmaqla əldə etdikləri valyuta vəsaitləri müəssisələrin valyuta gəlirləridir və həmin gəlirlərdən müvafiq qaydada Respublika Vahid Valyuta Fonduna ayırmalar köçürülür;

b) xaricə mal göndərənlərin və xaricdən mal alanların, habelə xarici müştərilərin xarici valyuta ilə daşınma, sığorta müşayiət etmə xərclərinin ödəmələri dəmiryol, avtomobil, hava, dəniz və çay nəqliyyatı, sığorta və müşayiət etmə (ekspeditor) müəssisə və təşkilatların valyuta gəlirini təşkil edir (daşınma, sığorta və müşayiət etmə ilə bağlı xarici valyuta xərcləri çıxılmaqla) və həmin gəlirdən müvafiq qaydada respublika Vahid Valyuta Fonduna ayırmalar köçürülür;

v) xarici müştərilərlə vasitəçilik və kommersiya əməliyyatları aparan müəssisələrin həmin əməliyyatlardan əldə etdikləri valyuta onların valyuta gəlirləridir və həmin gəlirlərdən müvafiq qaydada respublika Vahid Valyuta Fonduna ayırmalar köçürülür;

q) müəssisələrin valyuta gəlirlərindən müvafiq qaydada respublika Vahid Valyuta Fonduna ayırmaları köçürdükdən sonra sərəncamlarında qalan vəsait hesabına investisiyalardan, qiymətli kağızlardan, vəsaitin depozit, pay və digər formalarda yerləşdirilməsindən xarici valyutada aldıqları dividendlər və ya gəlirin bütün məbləği onların valyuta hesablarına köçürülür və bu vəsaitdən respublika Vahid Valyuta Fonduna ayırmalar edilmir;

e) Azərbaycan Respublikası hüquqi şəxslərinin ünvanına humanitar yardım və xeyriyyə məqsədləri üçün ianələr şəklində daxil olan valyuta vəsaiti tamamilə onların sərəncamında qalır;

j) tamamilə xarici investorlara məxsus olan müəssisələrin və nizamnamə fondunda xarici investisiya 30 faizdən çox olan müştərək müəssisələrin özlərinin istehsal etdikləri məhsulun ixracatından əldə etdikləri valyuta «Xarici investisiyaların qorunması haqqında» Azərbaycan Respublikası Qanununa əsasən onların sərəncamında qalır.

z) malların, (iş və xidmətlərin) ixracından alınan valyuta gəlirlərindən mövcud normativlərə uyğun respublika Vahid Valyuta Fonduna köçürülən valyuta vəsaitlərinin əvəzində ixracatçılara qiymətləri tənzimlənən və deklarasiya olunan mallar (işlər və xidmətlər) üzrə respublika daxili qiymətləri ilə, digər mallar (işlər, xidmətlər) üzrə isə onların faktiki maya dəyəri və 15 faizlik rentabellik nəzərə alınmaqla milli valyuta ilə respublika büdcəsindən ödənilir;

i) məhsulların (işlərin, xidmətlərin) daxili qiymətləri barədə rəsmi arayış İqtisadiyyat Nazirliyi ilə razılaşdırılmaqla müəssisələr tərəfindən Milli Banka təqdim edilir.

4. Azərbaycan Respublikası ərazisində xarici firmalarla bağlanmış müqavilələr əsasında obyektlərin layihələşdirilməsi və tikilməsi, digər işlərin görülməsi və xidmətlərin göstərilməsindən alınmış valyuta gəlirlərinin 40 faizi respublika Vahid Valyuta Fonduna köçürülür və bu ayırma faizinə uyğun görülən işlərin, göstərilən xidmətlərin maya dəyəri bu bəndin «z» abzasında müəyyən edilmiş qaydada milli valyutada respublika büdcəsi hesabına ödənilir;

• hüquqi şəxslər tərəfindən digər hüquqi şəxslərə mənsub olan malların bağlanmış müqavilələr əsasında emal edilməsindən alınan valyuta gəlirlərinin 40 faizi respublika Vahid Valyuta Fonduna köçürülür və həmin ayırmanın manat örtüyü Milli Bankın müəyyənləşdirdiyi məzənnənin 50 faizi həcmində milli valyutada respublika büdcəsi hesabına ödənilir;
• Ticarət-Sənaye Palatasının fəaliyyətindən, xarici turizm sahəsində, fond və əmtəə birjalarında fəaliyyətdən, reklam fəaliyyətindən, binaların icarəyə verilməsindən, sərgilərin və yarmarkaların təşkilindən alınan valyuta gəlirlərindən Azərbaycan Respublikası Prezidentinin 1994-cü il 25 aprel tarixli 77 saylı sərəncamı ilə təsdiq olunmuş normativlərə uyğun həcmlərin manat örtüyü Milli Bankın müəyyənləşdirdiyi məzənnənin 50 faizi həcmində respublika büdcəsi hesabına ödənilir;
• Ticarət evləri, ixtisaslaşdırılmış müəssisələr və firma mağazaları daxil olmuş valyuta gəlirlərinin valyuta xərclərindən artıq hissəsinin 50 faizini respublika Vahid Valyuta Fonduna köçürürlər və onun manat örtüyü Milli bankın müəyyən etdiyi məzənnənin 50 faizi həcmində respublika büdcəsi hesabına ödənilir;
• Mehmanxanalar, restoranlar və xarici valyutada xidmət göstərən digər istirahət və əyləncə müəssisələri daxil olmuş valyuta gəlirlərinin valyuta xərclərindən artıq həssəsinin 50 faizi həcmində vəsaiti Vahid Valyuta Fonduna köçürürlər və onun manat örtüyü Milli Bankın müəyyən etdiyi məzənnənin 50 faizi həcmində ödənilir;
• xarici valyuta ilə ödənilən ixrac və idxal əməliyyatları üzrə gömrük rüsumları (vergiləri) və müsadirə olunmuş valyuta vəsaitləri müvafiq dövlət orqanları tərəfindən tam həcmdə respublika Vahid Valyuta Fonduna köçürülür;
• xarici ölkələrdəki Azərbaycan Respublikasının səfirliklərində, konsulluqlarında vizaların rəsmiləşdirilməsindən alınan valyuta vəsaiti tam həcmdə respublika Vahid Valyuta Fonduna köçürülür;
• Azərbaycan Respublikası ərazisində Xarici İşlər Nazirliyi, Daxili İşlər Nazirliyi, vizaların rəsmiləşdirilməsindən, xarici hüquqi və fiziki şəxslərə göstərdikləri xidmətlərdən, Xarici İqtisadi Əlaqələr Nazirliyi və Maliyyə Nazirliyi tərəfindən xarici firma və şirkətlərin nümayəndəliklərinin, xarici investisiyalı müəssisələrin və onların filiallarının dövlət qeydiyyatından, Dövlət Gömrük Komitəsi tərəfindən göstərilən gömrük xidmətlərindən alınan valyuta vəsaitinin 35 faizi müvafiq olaraq Xarici İşlər Nazirliyinin, Daxili İşlər Nazirliyinin, Xarici İqtisadi Əlaqələr Nazirliyinin, Maliyyə Nazirliyinin və Dövlət Gömrük Komitəsinin tələbatının ödənilməsinə, 65 faizi ilə respublika Vahid Valyuta Fonduna yönəldilir;
• Azərbaycan Respublikası ərazisində xarici firmalar ilə bağlanmış müqavilələr əsasında respublikanın təsərrüfat subyektləri və digər hüquqi şəxslər tərəfindən obyektlərin tikilməsindən və sairə xidmətlərin göstərilməsindən alınan valyuta gəlirindən xaricdə həmin işlərin görülməsi üçün Azərbaycan Respublikası Prezidentinin 1994-cü il 25 aprel tarixli 77 saylı Sərəncamı ilə təsdiq olunmuş normativlərə uyğun ayırmalar respublika Vahid Valyuta Fonduna köçürülür və ayırmanın manat örtüyü, bu qərarın 3-cü bəndinin «z» abzasında göstərilən qaydada respublika büdcəsi hesabına milli valyutada ödənilir.

Azərbaycan Respublikası ərazisində mülkiyyət formasından asılı olmayaraq xarici valyutalar üzrə əməliyyatlar aparan banklar Azərbaycan Respublikası Prezidentinin 1994-cü il 25 aprel tarixli 77 saylı sərəncamına uyğun olaraq bu əməliyyatlardan aldıqları valyuta gəlirinin 45 faizini respublika Vahid Valyuta Fonduna köçürürlər və onun manat örtüyü Milli Bankın müəyyən etdiyi məzənnənin 50 faizi həcmində ödənilir.

5. Müəyyən edilsin ki:

• müəssisələr ixracatdan aldıqları valyuta gəlirlərini mütləq Azərbaycan Respublikası ərazisində yerləşən və xarici valyuta ilə əməliyyat aparan müvəkkil banklardakı hesablarına daxil etməlidirlər;
• müəssisələr müvafiq icazəsi olmadan xarici banklarda valyuta vəsaiti saxladıqda Azərbaycan Respublikasında qüvvədə olan qanunvericiliyə uyğun olaraq məsuliyyət daşıyırlar.
• Müəssisələr tərəfindən uzaq xarici ölkələrə mal göndərilməsi üçün müqavilələr sərbəst dönərli valyuta ilə hesablaşma əsasında bağlanmalıdır;
• respublika Vahid Valyuta Fonduna valyuta ayırmalarının ödənilməsinin düzgünlüyü və vaxtında köçürülməsinin tam hüquqi və maddi məsuliyyətinin müəssisələr daşıyır. Gizlədilmiş valyuta vəsaiti dəyəri milli valyutada ödənilmədən tam həcmdə respublika Vahid Valyuta Fonduna köçürülür.
• Respublika Vahid Valyuta Fonduna valyuta ayırmalarının vaxtında və düzgün köçürülməsinin təmin edilməsi üçün xarici valyuta ilə əməliyyat aparan müvəkkil banklar da məsuliyyət daşıyırlar.

6. Azərbaycan Respublikası Milli Bankına tövsiyə edilsin ki, hər hansı müvəkkil bankda valyuta ayırmalarının düzgün və vaxtında aparılmaması halları müəyyən edilərsə, həmin banka verilmiş lisenziyanın geri alınması məsələsinə baxsın.

7. Müəssisələr aldıqları valyuta gəlirindən təsdiq olunmuş normativlərə əsasən ayırmaları 10 gün ərzində respublika Vahid Valyuta Fonduna köçürməlidirlər. Valyuta ayırmaları vaxtında köçürülmədikdə müəyyən olunmuş müddət qurtaqdıqdan 3 gün ərzində müvəkkil banklar müəssisələri gözləmədən mövcud normativlərə əsasən ayırmaları respublika Vahid Valyuta Fonduna köçürürlər.

8. Azərbaycan Respublikası Milli Bankına tövsiyə edilsin ki, Azərbaycan Respublikası Nazirlər Kabinetinin 1993-cü il 30 noyabr tarixli 575 saylı qərarı əsasında Milli Bankın ehtiyat Fonduna yığılmış valyuta vəsaitlərinin tam həcmdə respublika Vahid Valyuta Fondunun Milli Bankdakı hesablarına köçürülməsini təmin etsin.

9. Azərbaycan Respublikası Milli Bankı, Maliyyə Nazirliyi və Səhmdar Kommersiya Beynəlxalq Bankı respublika Vahid Valyuta Fonduna müəssisələr tərəfindən onların əldə etdikləri valyuta gəlirindən ayırmaların köçürülməsi qaydalarını 10 gün müddətində hazırlayıb təsdiq etsinlər.

10. Müəyyən edilsin ki, Azərbaycan Respublikası ərazisində müəssisələr tərəfindən xarici valyutaların alqı-satqısı Valyuta Birjası vasitəsilə aparılmalıdır və bu əməliyyatların birjadan kənar həyata keçirilməsinə yol verilmir.

11. Müəyyən edilsin ki:

Azərbaycan Respublikasında dövriyyədə olan pul vahidinin xarici valyutalara olan nisbəti Milli Bank tərəfindən hər an dəyişilə bilən məzənnə ilə müəyyənləşdirilir.

Ərzaq məhsulları, dərman preparatları, tibb avadanlığı və ləvazimatı alındıqda, digər büdcə təşkilatlarına respublika Vahid Valyuta Fondundan vəsait ayrıldıqda həmin vəsaitin manat örtüyünün ödənilməsi qaydası Maliyyə Nazirliyinin təklifinə əsasən Azərbaycan Respublikası Nazirlər Kabineti tərəfindən müəyyənləşdirilir.

12. Azərbaycan Respublikası Nazirlər Kabinetinin 1992-ci il 3 noyabr tarixli 604 nömrəli, 1993-cü il 30 noyabr tarixli 575 saylı qərarları, 1992-ci il 1 iyun tarixli 301 nömrəli qərarının 6-cı bəndi və 1994-cü il 19 yanvar tarixli 19 saylı qərarının 1-ci bölməsinin 4-cü bəndi qüvvəsini itirmiş hesab edilsin.

© AzerSoft